काठमाडौं
काठमाडौंमा आफ्नै घर हुने घरबेटी अनि डेरामा बस्ने डेरावालको जीन्दगी केलाउदै निर्माण गरिएको चलचित्र ‘के घर के डेरा ः घर नं २’को ट्रेलर सार्वजनिक भएको छ ।
दीपेन्द्र के खनाल निर्देशित चलचित्र ‘के घर के डेरा ः घर नं २’को ललितपुरमा एक औपचारिक कार्यक्रम आयोजना गरेर ट्रेलर सार्वजनिक गरिएको हो ।
ट्रेलरमा घर र डेराबीच अन्तर छ । घर मोहले निम्त्याएको समस्या प्रष्ट देखाइएको छ । घर नै सबैथोक हो, प्रतिष्ठाको प्रतीक हो भन्ने अहिलेको यथार्थलाई देखाइएको छ ।
घर जोगाउन र जोड्न युवा पुस्ताले गरेको संघर्ष र त्यसले सिर्जना गरिरहेको नकारात्मक पक्षलाई ट्रेलरले देखाएको छ । घर मोहले बिग्रिएको आर्थिक कारोबार र परिवारलाई ट्रेलरमा प्रष्टसँग देखाउने काम निर्देशकले गरेका छन् ।
‘पशुपतिप्रसाद’, ‘आमा’, ‘चिसो मान्छे’जस्ता सफल सोसल ड्रामामा चलचित्र दिएका निर्देशक खनालको चलचित्र ‘के घर के डेरा ः घर नं २’ जेठ २ गतेदेखि प्रदर्शनमा आउँदै छ ।
चलचित्रले घर र डेराबीचको अन्तरको कथा भन्नेछ । घर र डेराबीचको फरक बसाइले जीवनमा पारेको प्रभावको कथा भन्नेछ ।
घर र डेरा कै कारण जतिसुकै उचनिच व्यवाहार भए पनि अन्ततः त्यसको प्रभाव जीवनको अन्त्यमा के पर्छ यसबारे पनि ‘के घर के डेरा ः घर नं २’ले भन्ने निर्देशक खनालले बताएका छन् ।
‘के घर के डेरा ः घर नं २’को कथा साहित्यकार बुद्धिसागरले लेखेका छन् । उनको यो पहिलो सिनेमा हो ।
चलचित्र एप्पल इन्टरटेन्मेन्ट, ए प्लस इन्टरटेन्मेन्ट तथा नटराज क्रिएसनको प्रस्तुतिमा निर्माण भएको हो ।
कृष्णबहादुर थापाको सिनेमामा छायांकन रहेको छ । ‘के घर के डेरा ः घर नं २’को निर्मातामा नकिमउद्दिन, शरद श्रेष्ठ र किरण महर्जन छन् । कार्यकारी निर्माताको रूपमा युवराज कार्की छन् ।
प्रतिक्रिया