दोलालघाटदेखि पचुवारघाटसम्म रिभर ट्यूबिङ सुरु

काठ्माडौ
काभ्रेकोे दोलालघाटदेखि पचुवारघाट्सम्म रिभर ट्यूबिङ्ग सुरु गरिएको छ । रिभर ट्यूबिङको सुरुआतसँगै साहसिक पर्यटनका पारखीहरूका लागि नयाँ गन्तव्यको रूपमा देखा परेको छ । यो सेवा पहिलो पटक सुरु भएको आयोजकको दाबी छ ।

पछिल्लो समय रिभर ट्यूबिङ्गबारे अहिले धेरैको चासोको छ । पर्यटकहरू ठूला र बलिया रबर ट्यूबमा बसेर नदीको प्राकृतिक बहावसँगै रमाइलो गर्ने अवसर मिल्छ । नदीको छालसँग खेल्दै बग्ने यो यात्राले साहसिक अनुभूति मात्र होइन शारीरिक र मानसिक ताजगी पनि प्रदान गर्छ । विशेष गरी गर्मीयाममा चिसो पानीमा रमाउने चाहना भएका पर्यटकहरूका लागि यो सेवा उत्कृष्ट विकल्प हुन सक्छ ।
पछिल्लो समय ४८ जनाले रिभर ट्युबिङ सेवा लिएका हुन् ।

रिभर ट्युबिङ नेपालका फाउण्डर यमन माझीका अनुसार नेपालमा साहसिक पर्यटनलाई अझ विस्तार गर्ने लक्ष्यका साथ रिभर ट्यूबिङ सुरु गरिएको बताएका छन् । उनले भने, “नेपालमा पहाडी गन्तव्यहरू र ट्रेकिङ्गका थुप्रै विकल्पहरू भए पनि नदीमा रमाउने सुविधाहरू सीमित छन् । हामीले त्यसलाई नयाँ दिशा दिन खोजेका हौं।”
रिभर ट्यूबिङ्ग प्याकेजमा सहभागी हुनेहरूका लागि खानपान र यातायातको व्यवस्थासमेत समेटिएको छ । दोलालघाटमा सुरु हुने यो यात्रामा स्थानीय परिकारहरू पनि स्वाद लिन सकिनेछ । पर्यटकहरूको सुविधाका लागि सुरक्षा उपकरण र मेडिकल किटको व्यवस्था समेत गरिएको जनाइएको छ ।

यसका साथै उद्घाटनको अवसरमा पहिलो महिनाभरि आउने पर्यटकहरूलाई विशेष छुटको व्यवस्था गरिएको उनले बताएका छन् ।