चलचित्र ‘माइतीघर’मा ५९ वर्ष अघिको गीत समावेश, बाग्लुङको कालिका मन्दिरमा छायांकन

काठमाडौं
चलचित्र ‘माइतीघर’मा ५९ वर्ष अघिको चर्चित गीत ‘बसन्त नै बस्न खोज्छ यहाँ लोलाएर’ समावेश गरिएको छ ।

सो गीत बाग्लुङको कालिका मन्दिरमा छायांकन गरिएको निर्माता रोहित अधिकारीले जानकारी दिएका छन् ।

गीतको भिडियोमा चलचित्रका नायिकाद्धय उपासना सिंह ठकुरी र श्यामश्री शेर्पाको नृत्य हेर्न सकिन्छ । उनीहरुसँगै यो गीतमा ५० बढी कोरसलाई समेत फिचरिङ गरिएको निर्माता अधिकारीले जानकारी दिएका छन् ।
५९ वर्ष अगाडि चलचित्र ‘माइतीघर’मा समावेश बोलको गीत आज पनि दर्शकहरुको मुखमा झुन्डिएको छ । सोही गीतलाई रोहितले आफ्नो चलचित्र ‘माइतीघर’मा समावेश गरेका हुन् । यो गीतले पनि दर्शकको माया पाउने विश्वास गरिएको छ ।
गीतमा सञ्जिवनीको स्वर, किरण खरेलको शब्द र जयदेवको संगीत छ । गीतको भिडियोलाई कमल राइले कोरियोग्राफी गरेका हुन् ।
चलचित्र ‘माइतीघर’लाई दशैंको फूलपातिबाट प्रर्दशन गर्ने घोषणा यसको निर्माणपक्षले गरिसकेको छ । यो चलचित्रलाई उत्कृष्ट बनाउन कुनै पनि कसर बाँकी नराखिएको निर्माणपक्षको भनाई छ ।
चलचित्र ‘माइतीघर’लाई मिलन तामाङले निर्देशन गरिरहेका छन् । चलचित्रमा तामाङ संस्कृतिलाई पनि समावेश गरिएको छ । जुन चलचित्रको एक महत्वपूर्ण हिस्सा हो ।
सुसन प्रजापतिको छायांकन रहेको चलचित्रमा रोहित अधिकारी, रविन शेरचन र धीरज तामाङको लगानी छ । चलचित्रका कार्यकारी निर्माता ईश्वर श्रेष्ठ र निरज कटुवाल हुन् ।
यो चलचित्रमा केदार घिमिरे, धिरज मगर, प्रकाश सपुत, उपासना सिंह ठकुरी, श्यामश्री शेर्पा, युवराज लामा, वुद्दि तामाङ, शिशिर वाङ्देल लगायतका कलाकारहरुको अभिनय छ ।
यो चलचित्रको छायांकन म्याग्दीको ताकम गाउँ र धारापानी गाउँमा गरिएको छ ।