चलचित्र ‘एक्का तीन’ निर्माणको घोषणा, अभिनेत्री पूजा एक्सन अवतारमा देखिने संकेत

काठमाडौं
चलचित्र ‘एक्का तीन’ निर्माणको घोषणा गरिएको छ ।
निर्देशन गरेका निर्देशक रुपेश तामाङले अभिनेत्री पूजालाई लिएर एक्सन चलचित्र निर्माण गर्ने संकेत गर्दै पोस्टर सार्वजनिक गरेका छन् । चलचित्रको मुख्य भूमिकामा नायिका पूजा शर्माले काम गर्ने पक्का भइसकेको छ ।
गतबर्ष चलचित्र ‘दान्भी’ लिएर आएका निर्देशक तामाङले नयाँ चलचित्रको नाम ‘एक्का तीन’ राखेका छन् । सुमन गजमेरको लेखन रहने यो चलचित्रलाई सन् २०२६ मा प्रर्दशन गर्ने घोषणा यसको निर्माणपक्षले गरेको छ ।
चलचित्रको सार्वजनिक थीम पोस्टरमा हेलिकप्टर देखिन्छ । जुना फिल्मस्को प्रस्तुतिमा तयार हुन लागेको चलचित्रलाई एक्सन विधामा निर्माण गर्न लागिएको हो । चलचित्र को थीम पोस्टरमा ठूलो विष्फोट समेत भएको देख्न सकिन्छ ।
थीम पोस्टरमा तीन जना पात्र छन् । जसमा दुई पुरुष र एक महिलालाई स्थान दिइएको छ । तर, अन्य मुख्य पात्रहरुको बारेमा निर्माणपक्षले केही पनि खुलाएको छैन । ‘एक्का तीन–च्याप्टर १’ भनिएकाले पनि यो चलचित्रको दोस्रो सिरिज पनि बन्ने संकेत निर्माणपक्षले दिएको छ ।
यसपटक चलचित्रमा एक्सन, सस्पेन्स र बलियो कथा रहेको रुपेशको भनाई छ । आफूले यसअघिका चलचित्रमा गरेका कमीकमजोरीलाई समेत सच्च्याएर यो चलचित्र निर्देशन गर्ने रुपेश बताउँछन् । चलचित्रको छायांकन चाडै नै सुरु हुनेछ । हाल चलचित्रको प्रि–प्रोडक्सनको काम धमाधम चलिरहेको छ ।