चलचित्र ‘जनै हराएको मान्छे’ को टिजरमा कोरिया जाने सपना

आजको पुस्ता विदेश जाने सपना पालेर बसिरहेको छ । गाँउ गाँउका युवाहरु खोरिया बेचेर भए पनि कोरिया जान चाहन्छन् अनि पैसा कमाउने रहर गरिरहेका छन् ।
यस्तै युवाहरुको मनोभाव समेटेर चलचित्र ‘जनै हराएको मान्छे’ रहस्य खुलेको छ । चलचित्रको टिजर सार्वजनिक भएसँगै चलचित्रको कथाबस्तु समय सान्दर्भिक र रोचक रहेको बुझ्न सकिन्छ ।

टिजरमा चलचित्रका मुख्य पात्र विजय बरालले कोरिया सपना पालेर बसेको युवाको भूमिकामा छन् । कोरिया जान बुवालाई मनाउँदाको नोकझोक र काठमाडौं पुगेपछि आफ्नै गाउँलेले गरेको ठगीको वरिपरि टिजर घुमेको छ ।

कोरिया जान्छु भनेर काठमाडौं आएका विजय कसरी काठमाडौंमै अलमलमा पर्दा सपना पनि गन्तव्यहीन भइरहेको छ भन्ने टिजरमा समेटिएको छ । । पछिल्लो समय हिट चलचित्र दिइरहेकी मिरुना र विजयको जोडी पनि चलचित्रको अर्को आर्कषण रहेको छ ।
टिजरमा चलचित्रका मुख्य पात्र विजयसँगै केकी अधिकारी, मिरुना मगर, सुशांक मैनाली, भोलाराज सापकोटालगायत अटाएका छन् ।

‘जनै हराएको मान्छे ः सम्बन्धका धागाहरू’लाई निर्देशक हिमाल न्यौपानेले निर्देशन गरेका छन् भने चलचित्र भदौ ६ गतेदेखि देशभर प्रर्दशनको तयारीमा छ ।

चलचित्रमा विजय, केकी, मिरुना, भोलाराज र सुशांकसँग रियर राई, भावना खपांगी मगर, रुपेश लामा, सुमन थापालगायतको अभिनय हेर्न पाइन्छ ।

पेपरक्लिपको ब्यानरमा निर्माण भएको चलचित्रका निर्माता कमल न्यौपाने र विमल न्यौपाने रहेका छन् । कार्यकारी निर्मातामा नारायण तिमिसिना, चुडामणि सिवाकोटी, आरके मानन्धर, सिआर बस्नेत, फिलिप डिसी र जेम्स महाराजन रहेका छन् ।

चलचित्रे कथा, पटकथा र संवाद भानुभक्त ढकालले लेखेका हुन् । चलचित्रमा थानेश्वर गौतम, अर्जुन पोखरेल, एसडी योगी र प्रशान्त सिवाकोटीको संगीत रहेको छ ।

सफल चलचित्र ‘पूर्णबहादुरको सारंगी’पछि विजय बरालको मुख्य भूमिकामा आउन लागेको यो पहिलो चलचित्र हो । विजयले सोमवार ‘पूर्णबहादुरको सारंगी’बाट उत्कृष्ट अभिनेताको राष्ट्रिय चलचित्र अवार्ड समेत पाएका छन् ।

विसं। २०८१ मा नेपाली चलचित्र उद्योगलाई ब्लकबस्टर सिनेमा दिने विजय र केकी ‘जनै हराएको मान्छे स् सम्बन्धका धागाहरू’को मुख्य भूमिकामा सँगै देखिँदै छन् ।