ललितपुर सुनाकोठीमा श्रीमतीको हत्या गरेको अभियोगमा श्रीमान पक्राउ

ललितपुर । श्रीमतीको हत्या गरेको आरोपमा एक युवकलाई प्रहरीले पक्राउ गरेको छ। मकवानपुर घर भइ ललितपुरको गोदावरी नगरपालिका–१३, झरूवारासीमा डेरा गरी बस्ने २० वर्षीया डोल्मा वाइवाको हत्या अभियोगमा उनका श्रीमान ३० वर्षीय मदन बहादुर स्याङतानलाई पक्राउ गरिएको हो। उनी ललितपुर महानगरपालिका–२७, सुनाकोठी बस्ने स्थायी बासिन्दा हुन्।

प्रहरीका अनुसार, दम्पतीबीच विवाद भएको अवस्थामा मदनले डोल्मामाथि चक्कु प्रहार गरेका थिए। घटनापछि प्राप्त जानकारीका आधारमा प्रहरी वृत्त चापागाउँ र प्रहरी प्रभाग धापाखेलबाट खटिएको टोलीले उनलाई शनिबार बिहान नियन्त्रणमा लिएको हो।

यस सम्बन्धमा प्रहरीले थप अनुसन्धान जारी रहेको जनाएको छ।