थातथलो छाडेर पोखरा पुगेकी हायु परिवारलाई फर्किन वडाध्यक्षको आग्रह

काठमाडौं । कास्कीको पोखरामा शरण लिएको उर्मिला हायुसहितको परिवारलाई गोलन्जोर गाउँपालिका–६ का वडाध्यक्ष रविन श्रेष्ठ नेतृत्वको टोलीले बुधबार भेटेर पुनः घर फर्कन आग्रह गरेको छ।

छ दिनअघि घर, चौपाया र पशुपक्षी छाडेर चुपचाप पोखरा पुगेको हायु परिवार सोमबार दिनभर हराएको भन्दै सञ्चारमाध्यममा प्रमुख समाचार बनेको थियो। त्यसपछि वडाध्यक्षसहितको टोली उनीहरूको अवस्थाबारे जानकारी लिन पोखरा पुगेको हो।

वडाध्यक्ष श्रेष्ठका अनुसार उर्मिला र उनका जेठा छोरा राजुलाई राखेर सम्भावित सहयोगको विषयमा विस्तृत जानकारी दिइएको थियो। उनले घर भएको जमिन किनिदिने, अस्थायी बसोबासका लागि वडाभित्रै छुट्टै स्थानमा घर निर्माण, शिक्षा, स्वास्थ्य र रोजगारी व्यवस्थाको प्राथमिकतासहित फर्कन आग्रह गरे।

श्रेष्ठले भने, “मैले त तत्कालका लागि सिन्धुलीमाडीस्थित मेरो खाली घरमा जानुस् भनेँ। पोखरा महँगो छ, तपाईंहरूलाई गाह्रो हुन्छ। छोरा तयार भए, तर आमा उर्मिला अझै मानेकी छैनन्।”

हायु परिवारले गाउँमा सडक, खानेपानी, स्वास्थ्य र शिक्षाको पहुँच नहुँदा बस्न कठिन भएको गुनासो गरेको वडाध्यक्ष श्रेष्ठले जानकारी दिए। परिवारका सदस्यहरूका अनुसार खेतबारीको उब्जनीले तीन महिना पनि खान पुग्दैन। त्यसैले शहर पस्नैपर्ने बाध्यता भएको उनीहरूको भनाइ छ।