काठमाडौं । काठमाडौंको बाँसबारीस्थित एक होटलमा जन्मदिनको पार्टी मनाइरहेका बेला गुण्डा नाइके ‘चक्रे मिलन’सहित केही व्यक्तिहरूलाई प्रहरीले पक्राउ गरेको छ।
काठमाडौं प्रहरी परिसर र उपत्यका अपराध अनुसन्धान कार्यालयको संयुक्त सादा पोशाक टोलीले अपरेशन चलाउँदै बाँसबारी रोडमा रहेको होटल साम्बालामा छापा मारेको थियो। दुई दिनदेखि होटलमा लगातार जन्मदिनको पार्टी चलिरहेको सूचनाका आधारमा प्रहरीले निगरानी गर्दै बुधबार राति कारबाही गरेको हो।
प्रहरीका अनुसार पार्टीमा विभिन्न आपराधिक पृष्ठभूमिका व्यक्ति भेला भएको सूचनाका आधारमा खोजतलास गर्दा ‘चक्रे मिलन’का साथै ‘सानुभाइ’का नामले चिनिने युवराज गुरुङलाई पनि नियन्त्रणमा लिइएको हो।
हाल उनीहरूलाई आवश्यक अनुसन्धानका लागि प्रहरी हिरासतमा राखिएको छ। प्रहरी स्रोतका अनुसार पक्राउ परेका केहीको आपराधिक गतिविधिसँग सम्बन्ध रहेको भन्दै विस्तृत सोधपुछ भइरहेको छ।
चक्रे मिलन विगतमा पनि विभिन्न आपराधिक मामिलामा संलग्न रहँदै आएका हुन्। प्रहरीले अब उनीहरूमाथि संगठित आपराधिक समूहसँगको संलग्नता लगायतका विषयमा अनुसन्धान अघि बढाउने तयारी गरेको छ।
प्रतिक्रिया