‘हर्क साम्पाङ रिभोलुसन एन्ड टिम’ले निर्माण गरेको चलचित्र ‘सोल्टिनी’ भाइटिकाबाट प्रर्दशनको घोषणा

काठमाडौं

‘हर्क साम्पाङ रिभोलुसन एन्ड टिम’ले निर्माण गरेको चलचित्र ‘सोल्टिनी’ भाइटिकाबाट प्रर्दशनको घोषणा गरिएको छ । यस समूहको नेतृत्व धरान महानगरपालिकामा मेयर हर्क साम्पाङ रहेका छन्।

एकसाथ पाँच पोस्टर सार्वजनिक गर्दै चलचित्र ’सोल्टिनी’को नयाँ प्रर्दशन मिति घोषणा गरिएको छ । प्रकाश सपुत र परीक्षा लिम्बु स्टारर यो चलचित्रलाई अर्जुन सुवेदीले निर्देशन गरेका छन् । जसमा प्रकाश र परीक्षाको साथमा विल्सन विक्रम राई, सब्बु गुरुङ, रवीन्द्र झा, प्रकाश घिमिरे, प्रेम सुब्बा, कविता आले, सुन्दर धिताल, सुजन खतिवडालगायतका कलाकारहरूले अभिनय रहेको छ ।

यस चलचित्रले दर्शकलाई फरक स्वादको कथासँग जोड्ने निर्देशक सुवेदीले दाबी गरे। चलचित्रले समाजमा व्याप्त अमानवीयता र जातीय भेदभावका विरुद्ध आवाज उठाउनेछ भने दुई प्रमुख पात्रबिचको प्रेम कथा यसको मुख्य आकर्षण रहेको छ। यो चलचित्र इलाम बजार, बिब्ल्याँटे, कन्याम, बिर्तामोड, पथरी र भोजपुरका रमणीय दृश्यहरूमा छायाङ्कन गरिएको छ।

चलचित्रलाई अर्जुन सुवेदी र कुमार भट्टराईले लेखेका छन्। प्लानेट थ्री फिल्म्स र योलो इन्टरटेन्मेन्टको सहकार्यमा बनेको यो चलचित्रका निर्माताहरू रेजिना बिस्ट र संसार चौलागाईँ हुन् भने रोशन चौलागाईँ, वसन्त कटुवाल र सुजन अधिकारी सह निर्माताहरू हुन्।