ओलीको टिप्पणी : भण्डारीको पार्टी सदस्यता अनावश्यक रूपमा उचालियो

काठमाडौं। नेकपा (एमाले)का अध्यक्ष तथा प्रधानमन्त्री केपी शर्मा ओलीले पूर्वराष्ट्रपति विद्यादेवी भण्डारीको पार्टी सदस्यता अनावश्यक रूपमा उचालिएको बताएका छन्।

शुक्रबार ललितपुरको गोदावरीस्थित सनराईज हलमा सुरु भएको एमालेको दोस्रो विधान महाधिवेशनलाई सम्बोधन गर्दै ओलीले भण्डारीको सदस्यताको विषय विधान महाधिवेशनसँग सम्बन्धित नभएकाले छलफल नहुने स्पष्ट पारे। उनले विधान महाधिवेशनमा केवल विधि र विधानसँग सम्बन्धित विषयमात्रै उठ्ने बताए।

ओलीका अनुसार पूर्वराष्ट्रपति भण्डारीको सदस्यता नवीकरणको विषय कमिटीगत छलफलको हो, त्यसैले सचिवालय, स्थायी कमिटी, पोलिटब्युरो वा केन्द्रीय कमिटीमै उठ्नेछ। “पार्टीमा कतिपय कुरा अनावश्यक रूपमा अघि बढाउन खोजिएको छ। तर विधान महाधिवेशनमा त्यस्ता विषयलाई छलफलमा ल्याउन सकिँदैन,” ओलीले भने।

विधान महाधिवेशनमा अध्यक्ष ओलीको राजनीतिक प्रतिवेदन, उपाध्यक्ष तथा अर्थमन्त्री विष्णु पौडेलको विधान संशोधन प्रस्ताव र महासचिव शंकर पोखरेलको सांगठानिक प्रतिवेदन प्रस्तुत हुने कार्यसूची रहेको छ। ओलीले महाधिवेशन यही कार्यसूचीमै केन्द्रित हुने बताए।

भण्डारीको सदस्यता नवीकरणबारे एमालेभित्र फरक मत देखा परेका छन्। उपाध्यक्षहरू युवराज ज्ञवाली र सुरेन्द्र पाण्डेले फरक धारणा राखेका छन् भने स्थायी कमिटी सदस्य कर्ण थापाले पनि भिन्न मत दर्ता गरेका छन्। तर यी मत विधान महाधिवेशनमा प्रवेश नपाउने एमालेले जनाएको छ।