बालाजुमा बसको ठक्करबाट पैदल यात्रुको मृत्यु

काठमाडौँ । काठमाडौँको बालाजुमा बसको ठक्करबाट एक जना पैदल यात्रुको मृत्यु भएको छ। उपत्यका ट्राफिक प्रहरी कार्यालयका एसपी दीपक गिरीका अनुसार बिहीबार बिहान सडक क्रस गर्ने क्रममा सङ्खुवासभा, खाँदबारी नगरपालिका–७ घर भएका ६८ वर्षीय जसबहादुर मगरलाई बसले ठक्कर दिएको हो।

बागमती प्रदेश–०१–००६ ७५४३ नम्बरको महानगर यातायातको बसले ठक्कर दिँदा गम्भीर घाइते भएका मगरलाई उपचारका लागि अस्पताल लगिएको थियो। तर, उपचारकै क्रममा उनको मृत्यु भएको प्रहरीले जनाएको छ।

घटनापछि चालकलाई नियन्त्रणमा लिएर थप अनुसन्धान भइरहेको उपत्यका ट्राफिक प्रहरी कार्यालयले जनाएको छ।