काठमाडौं
सामान्यतयाः चलचित्रको प्रचारका लागि हलमा सामान्य कार्यक्रम गरेर पत्रकार र सञ्चारकर्मीसामु टे«ेलर सार्वजनिक गर्ने चलन छ । प्रचारका लागि सञ्चारमाध्यम पुगेर चर्चाका आएका कलाकारहरु अन्र्तवार्ता दिने पुरानो चलनलाई भत्काउदै एक प्रेम कथानक चलचित्र ‘कुमारी’ले भिन्न प्रचारशैली पछ्याएको देखिन्छ ।
चलचित्र टिम पछिल्लो समय देशभरका कन्र्सटमा व्यस्त छ । माघ १ गते नेपालगन्जबाट सुरु भएको यो साङ्गीतिक यात्रा माघ ३ गते पोखराको लेकसाइड र माघ ६ गते चितवनको नारायणी तिरमा भव्य रूपमा सम्पन्न भइसकेको छ।
देशका प्रमुख सहरहरूमा साङ्गीतिक माहौल सिर्जना गर्दै हिँडेको निर्माण टोलीले आगामी माघ १० गते शनिवार साँझ ५ बजेदेखि काठमाडौंको भृकुटीमण्डपस्थित खुला स्थानमा एक भव्य साङ्गीतिक कार्यक्रमको आयोजना गर्ने भएको छ । सोही विशेष समारोहका दर्शकहरुसामु चलचित्रको बहु प्रतीक्षित अफिसियल ट्रेलर समेत सार्वजनिक गरिने तयारी छ।
भृकुटीमण्डपमा आयोजना हुने कन्सर्टमा चलचित्रका पाश्र्व गायक केहर सिं लिम्बु र उनको ब्यान्ड ‘केहर एन्ड द लुङा’ को मुख्य प्रस्तुति रहनेछ। साथै, लोकप्रिय महिला गायन समूह ‘इस्त्रीज’ले पनि आफ्नो गायकीमार्फत दर्शकलाई झुमाउनेछन्। चलचित्रका कार्यकारी निर्माता केदार भुसालले यो कन्सर्ट पूर्णतया निःशुल्क रहने जानकारी दिए। उनले सर्वसाधारण दर्शकलाई चलचित्रका कलाकार र सङ्गीतसँग जोड्ने उद्देश्यले कुनै पनि प्रवेश शुल्क नराखिएको बताए।
हजारौँ दर्शकको उत्साहजनक उपस्थिति रहेको यस यात्राले चलचित्रप्रति सर्वसाधारणको चासो ह्वात्तै बढाएको छ। पोखरा र चितवनको सफलतापछि सङ्घीय राजधानी छिर्न लागेको ‘कुमारी’ टोलीले भृकुटीमण्डपको कार्यक्रमलाई अझ विशेष बनाउने योजना बुनेको हो।
ट्रेलर सार्वजनिक कार्यक्रममा चलचित्रका मुख्य कलाकारहरू अबिशेक खड्का र आकृति राजभण्डारीका साथै निर्देशन दिनेश राउत र चलचित्रको पुरै युनिट तथा अन्य सेलिब्रेटी, पत्रकार र सर्वसाधारणको ठुलो उपस्थिति रहने जनाइएको छ। निर्देशक दिनेश राउतले मोफसलमा देखिएको दर्शकको अभूतपूर्व माया र क्रेजले आफूलाई निकै उत्साहित र पुलकित बनाएको बताएका छन्।
विनिश इन्टरटेन्मेन्टको ब्यानरमा महेन्द्र अधिकारीद्वारा निर्मित तथा विकास सुवेदीद्वारा लिखित यस चलचित्रको साङ्गीतिक यात्रा काठमाडौंपछि माघ १७ गते झापाको दमकमा पुगेर समापन हुनेछ। चलचित्रमा समावेश ’डोको बुन्ने’ गीतले युट्युबमा मात्र करिब आधा करोड भ्युजको यात्रा तय गरिसकेको छ भने लाखौँ टिकटक तथा रिल्स बनेका छन्। यस चलचित्रका ‘कता छौ मेरो फूल’ र ‘तिमी बिना’ जस्ता गीतहरूले यसअघि नै चर्चा कमाइसकेकाले पनि माघ १० गते सार्वजनिक हुने ट्रेलरलाई लिएर दर्शकमाझ निकै उत्सुकता देखिएको छ।
प्रतिक्रिया