गोटिखेलको चिहानबाट मध्यरातमा उम्मेदवार सनोजले गरे भाषण

चापागाँउ
फागुन २१ गते हुने प्रतिनिधि सभा सदस्यको निर्वाचनका लागि देशभर नेताहरु जनताको घरदैलोमा पुगेका छन् । ठाँउ ठाँउमा सभा, भेला र गोष्टी भइरहेका छन् । झण्डा बोकेर कार्यकर्ताले नारावाजी समेत लगाउन थालिसके ।

तर ललितपुरका पिपुल्स फस्ट पार्टीका उम्मेदवार सनोज महत भने फरक तरिकाले प्रचार प्रसारमा जुटेका छन् । उनी कहिले टेण्ट गाडेर बस्ती बस्तीमा रात विताउदै आफ्ना कुरा सुनाइरहेका भेटिन्छ त कहिले माइक बोकेर टोलमा एक्लै चिच्चाइरहेका हुन्छन् ।

निर्वाचन आयोगले उम्मेदवारहरुलाई प्रचार गर्न छुट दिएकै मध्यरात १२ बजे उनी दक्षिण ललितपुरको गोटीखेलस्थित कालमोचन घाटमा भाषण गर्न पुगेका छन् । मध्यरातमा घाटबाट भाषण गर्दा सुन्ने जनता त थिएनन् तर उनले सो भाषण सामाजिक सञ्जाल ‘सनोज महत पेज’बाट लाइभ गरेका थिए ।

राजनीतिक दलहरुबाट प्रशिक्षित जनताको माहुल्य रहेको समाजमा आफूले आफ्ना कुरा सुनाउन चाहेको सनोज बताउछन् । भन्छन्, ‘मेरा एजेण्डा र जनताको पक्षमा रहेको मुद्दा सुन्न चाहने मान्छेहरुको कमी देख्छु । म दक्षिण ललितपुरको आमुल परिवर्तनको लागि अघि बढेको छु । अब यहाँका जनताले मेरो कुरा सुन्नुपर्छ भनेर ध्यान जगाउन खोजेको हुँ ।’

भाषणका क्रममा विकास पुर्वाधार र रोजगारी नहुँदा दक्षिण ललितपुरमा बसाई सराईको समस्या विकराल बन्दै गएको भन्दै उनले चिन्ता व्यक्त गरे । उनले भने, ‘दक्षिण ललितपुर अहिले चिहानघारी बनेको छ । अव यहाँ नयाँ सम्भावना खोज्न तयार हुनुपर्छ ।’

महतले दक्षिण ललितपुरको टुंगुन करिडोर र वागमती करिडोर निर्माण गरेर बस्ती विकास र स्थानान्तरण गर्नुपर्ने र बाँकी पहाडी पाखाहरुमा उद्योग धन्दा सञ्चालन गर्नुपर्ने एजेण्डा अघि सारेका छन् ।

उनको प्रचारशैलीलाई लिएर आजकल ललितपुरमा चर्चा भइरहेको छ ।