काठमाडौं
नेपाली चलचित्र ’क्रलिङ क्रोजः आँखा’ संयुक्त राज्य अमेरिकामा आयोजना हुने वल्र्डफेस्ट–ह्युस्टन इन्टरनेसनल चलचित्र महोत्सवमा प्रतिष्ठित ’रेमी अवार्ड’का लागि मनोनित भएको छ।
विश्वभरका चलचित्र निर्माता र सिर्जनाहरूलाई एकै ठाउँमा ल्याउने यो महोत्सव आगामी अप्रिल २४ देखि मे ३, २०२६ सम्म अमेरिकाको टेक्सासस्थित ह्युस्टनमा आयोजना हुँदैछ।
जौन योञ्जनद्वारा निर्देशित एसिया प्यासिफिक चलचित्र महोत्सवमा ’उत्कृष्ट चलचित्र’को उपाधि जितेर ऐतिहासिक सफलता हासिल गरेको थियो। उक्त महोत्सवको सर्वोच्च सम्मान प्राप्त गर्ने यो पहिलो नेपाली चलचित्र हो।
सन् १९६१ मा स्थापना भएको ह्युस्टन इन्टरनेसनल चलचित्र महोत्सव विश्वकै सबैभन्दा पुरानो स्वतन्त्र चलचित्र महोत्सवमध्ये एक मानिन्छ। यो महोत्सव उदाउँदा चलचित्र निर्माताहरूलाई पहिचान दिलाउनका लागि प्रसिद्ध छ। स्टिभन स्पिलबर्ग, जर्ज लुकास, डेभिड लिन्च र आङ ली जस्ता दिग्गज हलिउड निर्देशकहरूले पनि आफ्नो करियरको सुरुवातमा यही महोत्सवबाट रेमी अवार्ड प्राप्त गरेका थिए।
’आँखा’ को यो मनोनयनले नेपाली चलचित्रलाई सम्मानित विश्वव्यापी प्लेटफर्ममा अन्तर्राष्ट्रिय चलचित्रहरूसँग प्रतिस्पर्धा गर्ने स्थानमा उभ्याएको छ। चलचित्र समीक्षकहरूका अनुसार, यो सफलताले नेपाली चलचित्र निर्माणको प्राविधिक तथा कथावाचनको बढ्दो शक्ति र राष्ट्रिय सिमानाभन्दा बाहिरका दर्शकहरूसम्म पुग्न सक्ने क्षमतालाई उजागर गरेको छ।
निर्देशक जैन योञ्जनले यस अन्तर्राष्ट्रिय मान्यताप्रति कृतज्ञता व्यक्त गरेका छन्। एसिया प्यासिफिक €चलचित्र महोत्सव जित्नेदेखि अमेरिकाको ह्युस्टनमा मनोनित हुनेसम्मको यस चलचित्रको यात्राले ’नेपाली कथाहरूले विश्वव्यापी दर्शकहरूको मन छुन सक्छन्’ भन्ने कुरा प्रमाणित गरेको उनले बताए।
एसियामा ऐतिहासिक जित र अमेरिकामा प्रतिष्ठित मनोनयनसँगै, ’आँखा’ ले नेपालको उदाउँदो चलचित्र उद्योगतर्फ विश्वको ध्यान आकर्षित गर्न सफल भएको छ। यो चलचित्रमा स्मिता लामिछाने, पशुपति राई, निशा अधिकारी, आरके मेहता, विजय बराल, बुद्धि तामाङ लगायतका कलाकारहरूको अभिनय रहेको छ । यस चलचित्रले सुकुम्वासी बस्तीमा जीवनयापन गरिरहेका सामान्य मानिसहरूको कथा, सङ्घर्ष र यथार्थ लाई गहिरो रूपमा चित्रण गरेको छ ।
प्रतिक्रिया