सार्वजनिक यातयात पुरै नखोले व्यावसायीद्वारा जर्वजस्ती चलाउने धम्की

१५ असार ०७८ । लामो निषेधाज्ञापछि क्रमशः खुकुलो हुँदै गईरहेका सन्दर्भमा व्यापार, व्यवसाय तथा बजार क्रमशः खुल्दै गईरहेको तर यातयात भने पूर्ण रुपमा सञ्चालन नभएको भन्दै यातयात व्यावसायीहरुले आपत्ती जनाउदै काठमाडौंका प्रमुख जिल्ला अधिकारी कालीप्रसाद पराजुलीलाइ ध्यानाकर्षण गराएका छन् ।
नेपाल यातायात व्यवसायी राष्ट्रिय महासंघ, नेपाल यातायात स्वतन्त्र मजदुर संगठन, नेपाल यातायात मजदुर संघ र अखिल नेपाल यातायात मजदुर संघका प्रतिनिधिमण्डलले मंगलबार प्रमुख जिल्ला अधिकारीलाई भेटि निर्णय नसच्याए असार १८ गते शुक्रबारदेखि देशैभरीका सम्पूर्ण सार्वजनिक सवारीका साधनहरु सञ्चालन गरिने धम्की दिएका हुन् ।
विहीबारदेखिे आन्तरिक हवाई यातायात सञ्चालन गर्ने निर्णय भएको तर सार्वजनिक यातयात नखोलिएकोमा असन्तुष्टि जनाउदै उनीहरुले अर्थतन्त्रलाई गतिशिल बनाउने जनताको दैनिक जीवनयापनलाई सहज बनाउने सार्वजनिक यातायात समेत पूर्ण सञ्चालन गर्नुपर्ने माग गरे । उनीहरुको यातायात श्रमिकहरुलाई खोपको प्राथमिकतामा राखिनु पर्ने, समयानुकुल बैज्ञानिक भाडा दर समायोजनाहुनु पर्ने, कोरोनाबाट ज्यान गुमाएका श्रमिक परिवारलाई राहत र संक्रमितहरुलाई निशुल्क उपचारको व्यवस्था गरिनु पर्ने मागसहितको आन्दोलन जारी नै रहेको  नेपाल यातायात स्वतन्त्र मजदुर संगठनका महासचिव नवराज घिमिरे बताए ।

प्रमुख जिल्ला अधिकारी पराजुलीले मागहरु स्वभाविक भएको बताउदै स्वास्थ्य संवेदनशिलतालाई ध्यान दिदै सम्पूर्ण सार्वजनिक सवारी साधनहरु सञ्चालनका लागि विधि र स्वास्थ्य मापदण्ड निर्माण र कार्यान्वयनका लागि १७ गते सरोकारवालाहरु सहितको बैठक बोलाएको महासचिव घिमिरेले बताए ।