थप ४ सय ६९ जनामा कोरोना पुष्टि, ११ को मृत्यु

१६ कात्तिक ०७८, काठमाडौं । देशभर ४ सय ६९ जनामा कोरोनाभाइरस संक्रमण पुष्टि भएको छ भने ११ जनाले ज्यान गुमाएका छन् ।

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा १० हजार २८७ जनामा भएको परीक्षणमा ४६९ जनामा संक्रमण पुष्टि भएको हो । यस्तै थप ५५५ जना संक्रमणमुक्त भएको मन्त्रालयले जनाएको छ ।

यससँगै देशभर कोरोना संक्रमितको कुल संख्या पीसीआर विधिबाट भएको परीक्षणमा ८ लाख १३ हजार ४३३ र एन्टिजेन विधिबाट भएको परीक्षणमा ९४ हजार ६७४ जना पुगेको छ ।

संक्रमितमध्ये ७ लाख ९२ हजार ८३२ जना निको भएका छन् भने ११ हजार ४२७ जनाको मृत्यु भएको छ । हाल देशभर ९ हजार १७४ जना सक्रिय संक्रमित रहेका छन् ।