बन्द गराउँदै हिँडेका विप्लवका १६ कार्यकर्ता पक्राउ

३० कात्तिक ०७८,कपिलवस्तु। कपिलवस्तुबाट नेत्रविक्रम चन्द ‘विप्लव’ नेतृत्वको नेकपाका १६ जना कार्यकर्ता पक्राउ परेका छन् ।
पेट्रोलियम पदार्थ लगायतका अन्य खाद्य वस्तुमा भएको मूल्यवृद्धिको विरोधमा बजार तथा यातायात बन्द गराउँदै हिँडेका नेकपा विप्लवका जिल्ला सचिवसहित प्रहरीले १६ जना कार्यकर्तालाई पक्राउ गरेको हो ।

जिल्ला प्रहरी कार्यालय कपिलवस्तुका प्रहरी उपरीक्षक दानबहादुर कार्कीका अनुसार जितपुरबाट ९ जना , चन्द्रौटाबाट ६ जना र गोरुसिंगेबाट १ जनालाई पक्राउ गरिएको छ ।
जितपुरबाट पक्राउ परेका नेता तथा कार्यकर्तालाई ईलाका प्रहरी कार्यलय पिपरा, चन्द्रौटाबाट पक्राउ परेकालाई वडा प्रहरी कार्यलय चन्द्रौटा र गोरुसिंगेबाट पक्राउ परेकालाई ईलाका प्रहरी कार्यलय गोरुसिंगेमा राखिएको उनले बताए ।