आजदेखि १२ देखि १७ वर्ष उमेर समूहलाई ‘बुस्टर डोज’

२७ जेठ ०७९, काठमाडौं । आजदेखि १२ देखि १७ वर्ष उमेर समूहलाई कोभिड–१९ विरुद्धको ‘बुस्टर डोज’ दिन थालिएको छ । पूर्ण मात्रा खोप लिएर ३ महिना नाघेका १२ वर्षदेखि १७ वर्ष उमेर समूहका किशोरकिशोरीलाई सरकारले शुक्रवारदेखि बुस्टर डोज लगाउने निर्णय गरेको हो ।

सरकारी तथ्याङ्कअनुसार मुलुकमा यो उमेर समूहमा ३४ लाख २५ हजार ४ सय ८ जना छन् । १२ देखि १७ वर्ष उमेर समूहलाई गत वर्ष पुस ४ गतेदेखि कोभिडविरुद्धको खोप दिन थालिएको हो ।
बुस्टरको रुपमा किशोरकिशोरीलाई मोडर्ना खोपको ०.२५ एमएल मात्रा वा फाइजर खोपको ०.३ एमएल मात्रा दिने सरकारको तयारी छ । हालसम्म मुलुकमा १२ वर्ष र सोभन्दा माथि उमेर समूहका जनसंख्यामध्ये २१.६८ प्रतिशत अर्थात् ५० लाख ५८ हजार ९ सय ६५ जनाले कोभिडको अतिरिक्त मात्रा खोप लिएका छन् ।