सातदोवाटोको देउराली सहकारीले घटायो बचत फिर्ता

ललितपुर खबर
१८ भदौं ०७९, ललितपुर । ललितपुर सातदोवाटोको केन्द्रिय कार्यालय खडा गरेर कारोकार गर्दै आएको देउराली बहुउद्देश्यीय सहकारीले बचतकर्तालाई दिदै आएको बचत फिर्ता १० हजारबाट घटाएर ५ हजारमा झारेको छ ।
गतअसारको पहिलो साताबाट बचत फिर्ता गर्न नसकेर समस्यामा परेको यस सहकारीले पछिल्लो समय आफूसँग पर्याप्त पैसा नभएको भन्दै तत्कालका लागि ५ हजार मात्रै बचत फिर्ता गर्न सक्ने भन्दै बचत फिर्ताको दर घटाएको हो ।
बचत फिर्ताका लागि सहकारीमा गएपछि तुरुन्तै पाइदैन । सहकारीले नाम लेखेर घर जाने अनि बोलाएपछि मात्रै चेक काटेर पैसा लिन पाइन्छ ।
एक बचतकर्ताका अनुसार एकपल्ट ५ हजार बचत फिर्ता लिएपछि अरु पैसा कहिले पाइन्छ त्यसको कुनै टुंगो छैन ।
सहकारीबाट ५ हजार पाएपछि भोलिपल्ट बाँकी पैसा लिन गए पाइदैन । तपाईले हिजै लगिसक्नु भयो नि भन्दै फर्काइन्छ । एक बचतकर्ताले नाम नबताउने शर्तमा भने, ‘आफ्नै पैसा लिन पनि सहकारीको नियम मान्नु पर्ने । सास्ती पनि भोग्नु पर्ने । सास्ती भोगेपछि पैसा चाही नपाउने यो कस्तो नियम ?’ उनले प्रतिप्रश्न गरे ।
सहकारीले दिनको लगभग २ लाख मात्रै बचत फिर्ता गर्ने गरेको छ । धेरै बचतकर्ता सहकारीको आगँनबाटै फर्काइन्छ ।

सहकारीका अध्यक्ष रविन्द्र चौलागाईले पछिल्लो समय बचत कर्ताको धेरै पैसा फिर्ता गरिएको बताए । उनले भने, ‘अव धेरैको पैसा दिन बाँकी छैन । जग्गा दिने योजनापछि धेरै बचतकर्ता सहमत छन् ।’
सहकारी कार्यालयबाट कर्चचारीहरु दिनको १ बजे नै घर फर्कने गरेका छन् । भएको पैसा सकिएपछि कार्यालय बन्द हुने गरेको छ । त्यसपछि सुरक्षा गार्डले कार्यालय बन्द भइसकेको भन्दै बचतकर्तालाईं कार्यालयमा पस्नै नदिई फर्काउछन् ।

पछिल्लो समय बजारमा बचत लिन जाने अवस्था छैन । ऋण उठाउन भने प्रतिनिधिहरु जाने गरेका छन् । त्यही उठेको ऋणबाट बचत फिर्ता भइरहेको बर्मचारीहरु बताउछन् ।
सहकारीमा काम गर्ने धेरै कर्मचारीहरुले जागिर छोडिसकेका छन् । भएका कर्मचारी पनि दिनभर तनावग्रस्त रहन्छन् ।
चारैतिर मुद्दा लागेको जग्गा छ पैसा छैन
सहकारीका अध्यक्ष रविन्द्र चौलागाई सहकारीको कारोबार डामाडोल बनाए पनि जग्गा भने चारैतिर जोडेका छन् । उनले लामाटार, सिस्नेरी, चितवन,हेटौडा,हात्तिवनलगायतका विभिन्न ठाँउमा प्रसस्त जग्गा जोडेका छन् ।
तर सबैजसो जग्गा पैसा नहुँदा मुद्दा लागेर रोक्कामा छन् । सककारीका एक कर्मचारीका अनुसार जग्गा बिक्रि गर्न सके कारोबार सल्टिन्छ । तर कारोबार सल्ट्उनका लागि पैसा हालिदिने र ऋणबाट मुक्त गरिदिने मान्छे छैन । उनले भने, ‘यो सबै जोखिम लिएर काम गरिदिने मान्छे छैन । अवौं पैसा खर्चेर सहकारी उतार्ने पैसा पनि छैन आजकल मान्छेहरुसँग ।’
यद्यपी सस्तोमा जग्गा लिएर कारोबार मिलाउने विभिन्न जग्गा दलाल रविन्द्रको पछि लागेका छन् । उनीहरु जग्गा धेरै सस्तोमा हात पार्न चाहन्छन् । पछिल्लो समय जग्गा भएर पनि विक्दैन । सबैलाई जोखिम छ ।
रविन्द्र चौलागाईलगायत ६ जना संलग्न रहेको एक आयुवेद्धिक कम्पनीको नाममा करिव ५७ कठ्ठा(७ सय ४१रोपनी) जग्गा रहेको पाइएको छ । त्यो जग्गामा भने मुद्दा नभएको उनीसँगै कारोबार गर्दै आएका जग्गा व्यावसायीले बताए । विहीबार मात्रै रियल स्टेट कम्पनी दर्ता गरिएको छ । यहाँको जग्गा कित्ताकाट गरेर सहकारीको बचतकर्तालाई नामसारी गर्ने तयारी रहेको उनको दावी छ ।
पछिल्लो समय चेक अनादार मुद्धामा पक्राउ परेर छुटेपछि सहकारीका अध्यक्ष रविन्द्र कारोबार मिलाउन दौडघुप गरिरहेका छन् । उनी एक करोड ३० लाख रकम तिरेपछि मात्रै छुटेका हुन् ।
पछिल्लो समय ५ लाखभन्दा धेरै बचत हुने बचतकर्ताको लागि जग्गा दिन नाम लेखाउन सुरु भएको छ । सहकारीले ५ लाखभन्दा धेरै बचत हुने बचतकर्तालाई पैसाको मुल्याङ्कन पुग्नेलाई एकल र नपुग्नेलाई संयुक्त नाममा जग्गा पास गर्ने तयारी छ । २ वर्षभित्र बचतको व्याज सहित फिर्ता गरेपछि जग्गा पनि फिर्ता लिने सहकारीको तयारी छ ।