रवि लामिछानेले लिए नेपाली नागरिकता

काठमाडौं, १५ माघ । रवि लामिछानेले नेपाली नागरिकता पुनः प्राप्त गरेका छन् । निवर्तमान उपप्रधान तथा गृहमन्त्री लामिछाने आइतबार जिल्ला प्रशासन कार्यालय काठमाडौंबाट नेपाली नागरिकता पुनः प्राप्त गरेका हुन् ।
लामिछानेले अमेरिकाको नागरिकताको प्रमाणपत्र त्यागिसकेको र त्यसको निस्सा पाइसकेकाले उक्त निस्सा जिल्ला प्रशासन कार्यालय बुझाएर प्रक्रिया पूरा गरी नयाँ नागरिकता पाएका छन् ।
सर्वोच्चले ‘पुरानो नागरिकतालाई वैधता दिन नसकिने’ भन्दै खारेज गरेसँगै लामिछानेको उपप्रधान तथा गृहमन्त्री र सांसद पद नै गएको थियो । उनले अमेरिकी नागरिकता त्यागे पनि नेपाली नागरिकता पुनप्राप्ति प्रक्रियामा गएका थिएनन् र पुरानै नेपाली नागरिकता प्रयोग गर्दै आइरहेका थिए ।