काँग्रेस एमाले दुवै प्रतिपक्षको बेञ्चमा बस्ने खोजेपछि प्रतिनिधिसभा बैठक स्थगित

काठमाडौं
आज बोलाइएको प्रतिनिधिसभाको बैठक सूचना टाँस गरेर स्थगित भएको छ । काँग्रेस एमाले दुवै प्रतिपक्षको बेञ्चमा बस्न खोजेपछि प्रतिनिधिसभा बैठक स्थगित भएको हो ।
आज दिउँसो १ बजेका लागि निर्धारण गरिएको बैठक संसद् सचिवालयले सूचना जारी गर्दै आगामी चैत ५ गते सम्मका लागि स्थगित गरेको हो ।
संसद् सचिवालयका महासचिव डा भरतराज गौतमद्वारा जारी सूचनामा भनिएको छ “फागुन १७ गते आज दिनको १ बजे बस्नेगरी निर्धारण गरिएको बैठक विशेष कारणबस स्थगित भई आगामी चैत ५ गते आइतबार दिउँसो १ बजे बस्नेगरी निर्धारण गरिएको छ ।”
अब राष्ट्रपति पदको निर्वाचनपछि मात्रै प्रतिनिधिसभाको बैठक बस्ने छ । नेपाली काँग्रेस राष्ट्रपति निर्वाचनअघि सरकारमा नजाने र संसदमा प्रतिपक्षमा बस्ने भएपछि संसद बैठक सञ्चालनमा अप्ठ्यारो भएको थियो ।
यही फागुन २५ गते राष्ट्रपति पदको र आगमी चैत ३ गते उपराष्ट्रपति पदको निर्वाचन हँुदैछ ।