‘ललितपुर महानगरले व्यापारीलाई दुःख मात्रै दिन्छ, सुविधा दिदैन’

कुमारीपाटी जावलाखेल क्षेत्रका व्यापारीहरुले महानगरलाई लाखौैं कर तिर्ने गरेका छन् । तर हामीलाई सुविधा चाही खै ?

ललितखबर
२६ बैशाख । ललितपुरका व्यापारीहरुले ललितपुर महानगरले व्यापार व्यावसाय गर्ने व्यापारीहरुलाई दुःख मात्रै दिने गरेको गुनासो गरेका छन् ।
पाटनमा आयोजित एक कार्यक्रममा ललितपुर चेम्बर अफ कर्मसका अध्यक्ष पुक्ष्परत्न शाक्यले बैद्यानिक रुपमा दर्ता भएर कर तिर्ने व्यावसायीहरुलाई अनुगमनका क्रममा विभिन्न दुःख दिने गरेको आरोप लगाए । उनले भने, ‘पाटनमा फुटपाथमा व्यावसाय गर्ने व्यापारीहरुले कुनै नियम मान्नु पर्दैन । कर पनि तिर्नु पर्दैन । तर हामी नियम कानून मान्न दर्ता गरेर व्यावसाय गरेका व्यापारीहरुलाई महानगरले झण्झट मात्रै दिने गरेको छ ।’
उनले पाटन क्षेत्रमा अझै फुटपाथ व्यापार कायम राखेकोमा उनले महानगरको आलोचना गरे । काठमाडौंलगायत अरु नगरमा फुटपाथ व्यापार गर्नै पाइदैन । तर ललितपुरमा व्यवस्थित छैन भन्दै आलोचना गरेका छन् ।
कर तिर्ने व्यापारीहरुलाई महानगरले उचित सुविधा दिन नसकेको उनको गुनासो छ । भने, ‘कुमारीपाटी जावलाखेल क्षेत्रका व्यापारीहरुले महानगरलाई लाखौैं कर तिर्ने गरेका छन् । तर हामीलाई सुविधा चाही खै ?’ उनको प्रश्न थियो । व्यापारीहरुलाई सुविधा दिए मात्रै कर तिर्न आर्कषण बढ्ने उनको तर्क थियो ।
ललितपुर तयारी पोशाक व्यापार संघका अध्यक्ष मिलन श्रेष्ठले महानगरले सबै व्यापारीको हितमा कर नीति अवलम्बन गरे कर तिर्न व्यापारीहरु इच्छुक हुने बताए ।
ललितपुर महानगरकी उपमेयर मञ्जली शाक्यले केही दिनअघि एक कार्यक्रममा ललितपुरमा ६० प्रतिशत व्यापारीहरुले व्यावसाय दर्ता नै नगरी कारोबार गरिरहेको आरोप लगाएकी थिइन् ।
तयारी पोशाक व्यापार संघको रजत महोत्सवको अवसर पारेर आयोजित पत्रकार सम्मेलनमा यस क्षेत्रका व्यापारीहरु संगठित भएर अघि नबढेको स्थानीय उत्पादनलाई प्रोत्साहन नभएको विषयमाथि चर्चा गरिएको थियो । तयारी पोशाक संघ ललितपुरको जावलाखेल कुमारीपाटीदेखि गावाहाल र मैगलबजारमा मात्रै सिमित भएको विषय उठेको थियो ।
व्यापार संघका अध्यक्ष मिलन श्रेष्ठले आगामी दिनमा संघलाई भैसेपाटी,हरिसिद्धि र इमाडोसम्म विस्तार गर्ने योजना सुनाए । उनले भने, ‘हाम्रो कार्यक्षेत्र ललितपुर जिल्लाभर हो । हामी अन्य ठाँउमा पनि शाखा सिवस्तार गछौं ।’
ललितपुर क्षेत्रमा थुप्रै टेक्टायल कारखाना सञ्चालन हुने गरे पनि चीन भियतनामलगायत देशबाट कपडा ल्याई व्यापार हुने गरेकोले आन्तरिक उत्पादन र बजार विस्तार नभएको विदेशमा नेपाली मुद्रा जाने गरेको सरोकार वालाहरुले गुनासो गरे ।
रजत महोत्सव मनाउने
२०५३ सालमा पुष्परत्न शाक्यको नेतृत्वमा गतन भएको ललितपुर तयारी पोशाक व्यापार संघले रजत महोत्सव आयोजन ागर्ने भएको छ ।
महोत्सवको अवसरमा वर्षभरि पाटनमा विभिन्न कार्यक्रम हुनेछन् । कार्यक्रममा दिइएको जानकारी अनुसार रक्तदान, शहरी क्षेत्र सरसफाई दशैं तिहार उपहार कार्यक्रम, विभिन्न अस्पतालहरुसँग व्यापारीहरुलाई छुट सुवधा दिन सम्झौता,आयकर अन्र्तक्रिया,व्यावसायिक लेखा प्रणाली तालिमजस्ता कार्यक्रम आयोजना गरिनेछ ।