नेपाली सेनाको टोलीद्वारा सगरमाथा आरोहण

काठमाडौं, १ जेठ । नेपाली सेनाको टोलीले सोमबार सगरमाथा शिखर आरोहण गरेको छ। सफा हिमाल अभियानमा खटिएको कर्णेल किशोर अधिकारीको नेतृत्वको टोलीले सगरमाथा आरोहण गरेको हो।

जसमा कर्णेल किशोरसँगै कप्तानहरू दिपेन्द्रसिं खत्री, विष्णुबल राई र जवानहरू किशोर जवेगु, शंकर कुँवर छन्।

उनीहरुसँगै माउन्टेन गाइडको रुपमा भोजपुरका वोङछु शेर्पा र संखुवासभाका फुर्वा शेर्पा, फुर्वादोर्ची शेर्पा, लाक्पा शेर्पाले समेत आरोहण गरेका छन्।

सेनाको टोलीले सोमबार बिहान १० बजेर ५ मिनेटमा शिखर आरोहण गरेको हिमाल सफाइ अभियानको व्यवस्थापनमा खटिएको पिक प्रशोमन प्रालिका निर्देशक आङबाबु शेर्पाले बताए। सेनाको टोली मंगलबार ल्होत्से आरोहणको तयारीमा छ।