गोदावरी नगरपालिकाले निकाल्यो सहकारी सञ्चालकको पक्षमा सूचना

जारी सूचनामा ऋण नतिरे सम्पती रोक्का हुन सक्ने र ऋणको जायजेथाबाट असुल उपर हुने कानूनी व्यवस्था रहेको स्मरण गराइएको छ

३० असार । गोदावरी नगरपालिकाले नगरभित्रका सहकारीलाई सजिलो पर्ने गरि सूचना जारी गरेको छ ।
ऋणीले समयमै ऋण नतिर्दा सहकारीलाई बचत फिर्ता गर्न अप्ठ्यारो परेको भन्दै नगरपालिकाले सहकारी सञ्चालकहरुको पक्ष पोषण गर्दै सूचना जारी गरेको छ ।
नगरभित्र सञ्चालित सहकारीको ऋण उठाउन सहज हुने गरि सहकारी शाखाले शेयर सहस्यहरुलाई समयमै ऋण चुक्ता गर्न अनुरोध गर्दै सूचना जारी गरेको हो । जारी सूचनामा ऋण नतिरे सम्पती रोक्का हुन सक्ने र ऋणको जायजेथाबाट असुल उपर हुने कानूनी व्यवस्था रहेको स्मरण गराइएको छ ।
पछिल्ले समय सहकारीको ऋण नतिरे पनि हुने भन्ने जस्ता कुराहरु सामाजिक सञ्जालमा पोष्ट हुने गरेको थियो ।
सहकारी शाखाको फेसबुक पेजमा भने नगरपालिकाले चलखेल गरेको आरोप लगाइएको छ । कमेन्ट अनुसार नगरपालिकाको नलखेलका कारण सहकारी सञ्चालकहरुको पक्षमा सूचना जारी भएको हो ।
शशिधर न्यौपाने र गंगा केसीले नगरपालिकाले चलखेल गरेको आरोप लगाएका छन् । निर्मला क्षेत्रीले नगरपालिकाले सञ्चालक समितीका सदस्यहरुलाई पहिला कारवाही गर्न माग गरेकी छिन् । उनले नगरपालिकाका कर्मचारी र संस्थाका संचालक समितीका सदस्यहरु मिलेर जे गर्दा पनि हुने अवस्था रहेको कमेन्टमार्फत बताएकी छिन् ।

नगरपालिका भित्र सहकारी संस्थाहरुले लामो समयसम्म पनि बचतकर्ताको रमक भुक्तानी नगर्दा समेत सहकारी शाखाले सहकारीहरुलाई कारवाही नगरेको आरोप लाग्ने गरेको छ । सहकारी सञ्चालकहरु फरार रहेको अवस्थामा समेत आवश्यक कारवाही नभएको बचतकर्ताहरुको गुनासो छ ।