‘सारेगमपा लिटिल च्याम्प’की विजेता लामा गोदावरीमा कन्सर्ट गर्दै

२५ भदौं । भारतीय गायन रियालिटी शो ‘जीटीभी सारेगमपा लिटिल च्याम्प’की विजेता जेट्शन डोना लामा ललितपुरको गोदावरीमा कन्र्सट गर्ने भएकी छिन् ।

आगामी असोज ६ गते ललितपुरको गोदावरी सनराइज कन्फ्रेन्स हलमा कन्सर्ट गर्ने कार्यक्रम रहेको राजधानीमा आयोजित पत्रकार सम्मेलनमा जानकारी दिइएको छ ।

साधना कला केन्द्रका अध्यक्ष मिलन मोक्तानका अनुसार कन्र्सट कपनमा रहेको बाल अपांग टेवा संस्थाको सहयोगका लागि आयोजना गरिएको हो ।
‘बाल अपांग टेवा संस्थामा आश्रित बालबालिकाहरुलाई विद्यालय जान समस्या भएको पायौं । ह्वीलचेयरमा उनीहरु विद्यालय जान सक्ने अवस्था देखिएन । यो कार्यक्रमबापत उठेको रकमको केही प्रतिशतले उनीहरुलाई गाडी अथवा भेन किन्ने उद्देश्य हो’, मिलनले भने ।

विजेता लामाले १२ वटा हिन्दी गीत गाउनेछिन् ।

विजेता यही सेप्टेम्बर भदौं ३१ गते नेपाल आउने कार्यक्रम छ । कार्यक्रममा प्रत्यक्ष भिडियो संवादमा बोल्दै गायिका जेट्सनले नेपालमा कन्सर्ट गर्न आउन लाग्दा उत्साहित भएको बताइन् ।