नारायणहिटी दरबारमा राजा वीरेन्द्रको स्मृतिमा दीप प्रज्वलन तथा स्मृतिसभा

काठमाडौँ
१९ जेठ । तत्कालीन राजा वीरेन्द्रको २३औँ स्मृति दिवसमा आज साँझ नारायणहिटी दरबारलगायत क्षेत्रमा दीप प्रज्वलन गरिएको छ ।

राष्ट्रिय प्रजातन्त्र पार्टी (राप्रपा)सहित विभिन्न सङ्घसंस्थाद्वारा आयोजित कार्यक्रममा वीरेन्द्रको परिवारको तस्बिरमा माल्यार्पणका साथै दी प्रज्वलन गरिएको थियो । कार्यक्रममा राष्ट्र निर्माणमा वीरेन्द्रको योगदानको चर्चा गरिएको थियो ।

यसैबीच वीरेन्द्र शान्ति प्रतिष्ठानले जावलाखेलस्थित सालिकमा माल्यार्पणसहित स्मृतिसभा गरेको छ ।

प्रतिष्ठानका अध्यक्ष शिवहरि खनालले राजा वीरेन्द्रले मुलुकको राष्ट्रियता, औद्योगिक विकास गरी जनतालाई समृद्ध बनाउन र प्रजातान्त्रिक व्यवस्था स्थापनामा ठूलो योगदान पु¥याएको बताएका छन् ।

प्रतिष्ठानका सचिव रञ्जित धमलाले राष्ट्रप्रेमी राजा वीरेन्द्रको शान्ति अभियानका साथै नेपाली जनतालाई गरेको प्रेम, विश्वास, विश्व शान्ति र समृद्ध नेपाल निर्माणका लागि गरेको योगदानलाई हामीले कहिल्यै भुल्न नहुने विचार व्यक्त गरे ।

राष्ट्रिय खेलाडी कृष्णभक्त न्यौपाने, समाजसेवी लक्ष्मी अधिकारीलगायतले स्व राजा वीरेन्द्रलाई राष्ट्रले उच्च सम्मान गर्नसक्नुपर्ने बताए ।

विसं २००२ पुस १४ गते जन्मिएका राजा वीरेन्द्रको २०५८ साल जेठ १९ गते राजदरबार हत्याकाण्डमा राजपरिवारका १० सदस्यसँगै हत्या भएको थियो ।