काठमाडौं । सांग्रिला डेभलपमेन्ट एसोसियसनको १० औं वार्षिक साधारणसभा तथा सामाजिक लेखा परीक्षण सम्पन्न भएको छ । शनिबार ललितपुरस्थित होटेल गुडविलमा भएको कार्यक्रम संस्थाकी अध्यक्ष प्रकृति भण्डारीको अध्यक्षता तथा कैलाश गाउँपालिकाका अध्यक्ष लोकबहादुर मुक्तानको प्रमुख आतिथ्यतामा सम्पन्न भएको हो ।
कार्यक्रममा प्रमुख अतिथि गाउँपालिका अध्यक्ष मुक्तानले सांग्रिलाले गाउँपालिकाका वडाहरुमा तल्लो वर्गलाई कसरी अगाडि बढाउन सकिन्छ भनेर काम गरिरहेको भन्दै प्रसंशा गरेका थिए ।
उनले स्थानीय सरकारसँग होस्टेमा हैसे भएर काम गर्न संस्थालाई आग्रह समेत गरे । उनले गाउँपालिकाभित्र कृषि, स्वास्थ्य र शिक्षाका क्षेत्रमा समन्वय गरी काम गर्न जरुरी रहेको पनि बताए ।
विशेष अतिथि कैलाश गाउँपालिकाका उपाध्यक्ष बालकुमार मल्ल ठकुरीले सांग्रिलाले सिमान्तकृत, दलित, पिछडिएका वर्गलाई मध्येनजर गर्दै काम गरेको भन्दै आगामी दिनमा उत्कृष्ठ र नयाँ ढंगबाट काम गर्न सुझाव दिएका थिए । उनले गाउँपालिकाका अन्य वडाहरुमा पनि कार्यक्रम विस्तार गर्न आग्रह गरे ।
कैलाश गाउँपालिका वडा नं. ३ का वडाध्यक्ष देवलाल बलले सांग्रिलाको सहयोगमा सञ्चालित एम्बुलेन्सबाट गाउँपालिकाका हजारौं बिरामीले सेवा पाएको बताए । वडा नं. ४ का वडाध्यक्ष तिलक बहादुर मोक्तानले वडामा सांग्रीलाले अभिभावकको काम गरेको भन्दै १० वटै वडामा काम विस्तार गर्न सुझाव दिए ।
वडा नं.७ का वडाअध्यक्ष उदास कुमार भोलान र वडा नं. ८ का वडाध्यक्ष आशिष चेपाङले संस्थाले गरेको काम सराहनीय रहेको भन्दै यसमा वडाको पूर्ण साथ र सहयोग रहेको बताए ।
कार्यक्रममा सांग्रिला अर्फोनेज होमका विशेष सल्लाहकार निता शाहीले सांग्रीला डेभलपमेन्टले गल्स होस्टेल राखेर छात्राहरुलाई शिक्षा दिनु आफैंमा प्रशंसनिय काम रहेको बताइन् ।
सांग्रिला अर्फोनेज होमकी अध्यक्ष यमुना मरासिनीले संस्थाले शिक्षा, कृषि र स्वास्थ्य क्षेत्रमा काम गरेको भन्दै देशको मानव विकास सूचाकांकमा समेत टेवा पुर्याएको बताइन् ।
सांग्रिला डेभलपमेन्टका विशेष सल्लाहकार जय शंकर उपाध्ययले संस्थाले भविष्यमा पुस्तान्तरण हुने ढंगले काम गरेको भन्दै नेपालभरी नै काम गरोस् भन्दै शुभकामना व्यक्त गरे ।
संस्थाकी अध्यक्ष प्रकृति भण्डारीले संस्थाले दशौं कोषेढुंगा पार गरेको भन्दै साझेदार संस्थालाई धन्यवाद व्यक्त गरेकी थिइन् । उनले संस्थाले भूकम्प, कोभिड लगायत मानविय संकटमा संस्थाले महत्वपूर्ण काम गरेको बताइन् । उनले आगामी दिनमा संस्थाले दिगो परिणाम र वातावरणीय परियोजनामा लक्षित रहेर अगाडि बढ्ने प्रतिबद्धता जनाइन् ।
कार्यक्रममा संस्थाका सदस्य विकास तिमिल्सिनाले स्वागत मन्तव्य, सचिव दशरथ घिमिरेले संस्थाको बारेमा जानकारी गराएका थिए । यस्तै कार्यक्रम संयोजक सागर थापाले परियोजनाको बारेमा प्रस्तुतीकरण दिएका थिए ।
कार्यक्रममा कृषि परियोजनाका पुरन बहादुर खड्का, शिक्षा परियोजनाका धनबहादुर मोक्तान, जुम्लाका विशेष बालबालिका कार्यक्रमका संयोजक हरिबहादुर बुध थापा, स्वास्थ्य सामाजिक परिचालक चमेली मोक्तान र स्वास्थ्य परियोजनाकी सोनी मल्लिक, लेखा अधिकृत सम्झना पौडेल, होस्टेल परियोजनाका विषयमा होस्टेल वार्डन अस्मिता श्रेष्ठ र सञ्चार संयोजक राजीभ प्रजापतिले कार्य विवरण प्रस्तुत गरेका थिए । कार्यक्रम सञ्चालन शिक्षा कर्मचारी शिव कुमार प्रजाले गरेका थिए ।
२०७१ सालमा स्थापना भएको संस्थाले मकवानपुरको कैलाश गाउँपालिका वडा नं ३,४, ७ र ८ र जुम्लामा कार्यक्षेत्र बनाएर काम गर्दै आएको छ । संस्थामा हाल एस.ए. स्वीजरल्याण्ड र जि.ए. जर्मनीको साझेदारी रहेको छ ।
प्रतिक्रिया