‘राम्रो काम गरेको’भन्दै मेयर चिरीबाबुले गरे आफ्नै प्रशंसा

ललितपुर
२५ भदौं । ललितपुरमा नीजि अस्पतालको प्रभाव बढ्दै गएको छ । यहाँ अल्का अस्पताल,सुमेरु अस्पताल, मेगालगायत अस्पताल खुलेको केही समयमै भीड बढेको देखिन्छ भने सरकारी अस्पतालको प्रभाव घट्दै गएको छ ।
यद्यपी ललितपुर महानगरका मेयर चिरीबाबु मर्हजन भने नीजि क्षेत्रको प्रभाव बढिरहेका बेला सबै काम आफ्नो नेतृत्वको महानगरले गरेको जसरी ललितपुर महानगर स्वास्थ्य क्षेत्रमा मुलुककै अग्रणी महानगर बन्ने भाषणबाजी गरेका छन् ।
ललितपुर महानगर १४ स्थित ताल्चिखेलमा आज अर्को नीजि अस्पताल खुलेको छ, स्वस्तिक अस्पताल ।
सोही अस्पतालकोे उद्घाटन गर्दै प्रमुख महर्जनले दुई वर्ष अगाडि स्वास्थ्य क्षेत्रमा उत्कृष्ट कार्य गरेको भन्दै नेपाल नगरपालिका सङ्घले पुरस्कृत गरेको भन्दै आफ्नै तारिफ गरेका छन् ।
नीजि क्षेत्रले गरेको सफलताको जस लिदै मेयर चिरीबाबुले भने,“ललितपुर महानगर स्वास्थ्य क्षेत्रमा कमजोर नभएको र देशभरकै उत्कृष्ट स्थानीय तहका रुपमा घोषित गरेको छ ।’

उनले नीजि अस्पतालले ललितपुरमा मा उत्कृष्ट सेवा दिने विश्वास व्यक्त गरे ।

उपमेयर मञ्जली शाक्य बज्राचार्यले अस्पतालले प्रवाह गर्ने सेवा सर्वसुलभ र गुणस्तरीय भएकाले नागरिकको अपेक्षा सम्बोधन हुने विश्वास व्यक्त गरिन् ।

स्वास्थ्य मन्त्रालयका अतिरिक्त स्वास्थ्य सचिव दिपेन्द्ररमण सिंहले पनि नीजि अस्पतालको प्रशंशा र पक्षपोषणमा समय खर्चिएका थिए । सरकारी तहबाट समुदायस्तरमा स्वस्थ्य सेवा सहज रुपमा पु–याउन चुनौती भएको भन्दै आफूहरुले राम्रो काम नगरेको स्वीकार गरे । उनले नीजि अस्पताल खुल्नुलाई महत्वपूर्ण भएको बताए ।
ललितपुर महानगरमा सरकारी अस्पतालको रुपमा पाटन अस्पताल संचालनमा रहे पनि गुणस्तरिय सेवा दिन सकेको छैन । ललितपुर महानगरले नगरबासीको स्वास्थ्यका लागि पर्याप्त लगानी नगरेको नगरबासीको गुनासो छ ।

१५ शय्या रहेको यस अस्पतालमा ३० जनाभन्दा बढी डाक्टर रहेको र आकस्मिक, बहिरङ्ग सेवालगायत सम्पूर्ण सेवा प्रदान गर्ने अस्पताल प्रशासनले जनाएको छ ।
वडासँगको समन्वयमा वडाका बालबालिका र ज्येष्ठ नागरिकलाई निःशुल्क सेवा प्रदान गर्ने अस्पतालका निर्देशक सिबी थापाले जानकारी दिए ।