२० कात्तिक । साफ वुमन्स च्याम्पियनसिपको फाइनल खेलमा प्रधानमन्त्री केपी शर्मा ओलीलक्षित आपत्तिजनक टिप्पणी गरेको भन्दै नेपाल प्रहरीको निगरानीमा रहेका भ्लगर रतन कार्कीले माफी मागेका छन् ।
कार्तिक १४ मा दशरथ रङ्गशालामा भएको फाइनल खेलमा प्रधानमन्त्री केपी ओली उपस्थित थिए । उता सोही समयमा जापानमा बस्ने कार्कीले प्रधानमन्त्रीको ‘हत्या गर्न सकिने’ अभिव्यक्ति दिएर सामाजिक सञ्जाल टिकटकमा एउटा भिडियो पोस्ट गरेका थिए ।
सामाजिक सञ्जालमा भिडियो पोस्ट गरेर उनले भनेका थिए, ‘तपाईँहरू फुटबल हेर्दै हुनुहुन्छ म अर्कै चिज हेर्दै छु, आज हामीले मार्न सकिन्छ । बाहिर एउटा ग्रुप बनाएर घेरेर बस्ने हो भने मार्न सकिन्छ, आज गरिएन भने हामी धेरै पछुताइन्छ ।’ उनको सो भनाइ प्रधानमन्त्रीप्रति लक्षित थियो ।
अहिले भने कार्कीले सो भनाई प्रधानमन्त्रीप्रति वा कुनै राजनीतिकर्मीप्रति लक्षित नभएको स्पष्टीकरण दिएका छन् । उनले मार्छु भन्ने शब्द ‘टङ् स्लिप’ भएको र यसका लागि माफ गरिदिन आग्रह समेत गरेका छन् ।
सामाजिक सञ्जाल टिकटकमा उनले माफी माग्दै एउटा भिडियो पोस्ट गरेका छन् । यस्तो छ उनको भनाई – खेलमा हामीले जित्यौँ हार्यौँ आफ्नो ठाउँमा छ । सिक्दै छौँ केही उपलब्धि हासिल भइनैहाल्छ । खेलको बिचमा धेरै फ्रस्ट्रेसन भए, खेल हारिन्छ कि जस्तो । यो खेलको पाटो भयो ।
कहिले काहीँ जिब्रो चिप्लिन्छ । हामीले ११ मा पढेकै हो । मार्छु भन्ने शब्द बोल्न पुगेँ । त्यो कुनै पनि कुरामा, त्यो जनवारमा किन न होस्, मान्छेलाई किन नहोस्, भन्नुको तात्पर्य गलत थिएन ।
तर, कमेडी गर्दा, गर्न सिकिरहँदा, प्रयास गर्दा, हैन गलत गरेछु कि भन्ने महसुस भइहाल्यो अचानक । त्यसपछि तुरुन्त त्यसलाई हटाइहाले ।
मार्छु भन्ने शब्द चाहिँ मैले त्यहाँ फ्रस्टेसन देखेँ, नेगेटिभ इनर्जी । त्यो कुनै राजनीतिज्ञले ममाथि नै यो शब्द प्रहार गर्यो भनेर नलिनुहोला ।
किनभने मैले कसैलाई सिध्याउनुपर्छ भनेर प्रस्तुतिमा त्यो आयो होला, तर मेरो भनाइमा त्यो होइनँ । मैले भन्न गलत गरेँ, त्यो शब्दका लागि सबैसँग माफी माग्न चाहन्छु । त्यो राजनीतिक पदमा बस्ने व्यक्तिका लागि लक्षित थिएन ।’
प्रतिक्रिया