दक्षिण ललितपुरको ठूलादुर्लुङमा आगलागी, घर जलेर नष्ट

चापागाँउ
दक्षिण ललितपुरको ठूलार्दुलुङस्थित एक घरमा भएको आगलागी पछि लाखौंको क्षति भएको छ ।
प्रहरीका अनुसार महांकाल गाउँपालिका ६ ठूलादुर्लुङका थोकरटोलमा ज्ञान बहादुर थोकरको घरमा आगलागी भएको हो ।
मंगलबार बिहान विद्युत सर्ट भएर आगो फैलिएको थियो । आगलागीपछि उनको घर पूर्णरूपमा जलेर नष्ट भएको छ ।सो घटनामा करिब १४ लाख ९३ हजार रूपैयाँ बराबरको धनमाल नष्ट भएको प्रहरीले प्रारम्भिक अनुमान गरेको छ ।
स्थानीयबासीको सहयोगमा आगलागी नियन्त्रणमा लिइएको छ । सदरमुकामबाट करिव ७० किलोमिटर टाढा रहेको ठूलार्दुलुङ पहाडी क्षेत्रमा दमकल लैजान कठीन भएका कारण तत्काल आगलागी नियन्त्रण गर्न कठीन भएको थियो ।
आगलागीका सम्बन्धमा थप अनुसन्धान भइरहेको प्रहरीको भनाई छ ।