बडिखेलमा बाँसका सरसामान बनाउने तालिम शुरु

ललितपुर
ललितपुरको बडिखेलमा बाँसका विभिन्न कलात्मक सरसामान बनाउने तालिम सुरु भएको छ ।
‘बाँसले जीवन राम्रो बनाउँछ’ भन्ने नाराका साथ सुरु भएको तालिममा २२ जना प्रशिक्षार्थीहरू सहभागी छन् ।
सोशल डेभलपमेन्ट भिजन, ललितपुरको आयोजनामा शुरु भएको तालिमलाई चीनको सिजाङ ( तिब्बत ) मा मुख्यालय रहेको गुडविल फाउण्डेसन र काठमाडौंमा रहेको नेपाल – चाइना कैलाश कल्चर प्रमोशन डेभलपमेन्ट एसोसिएसनले सहयोग गरेका छन् भने स्थानीय साझेदारको रुपमा गोदावरी नगरपालिका र गोदावरी उद्योग वाणिज्य संघ रहेका छन् । ग्रीन ब्याम्बो क्रियशनले तालिम संचालनका लागि प्राविधिक सहयोग गरेको छ ।
तालिमको गोदवरी नगरपालिकाका मेयर गजेन्द्र महर्जन र चिनिया दूतावासका कन्सुलर ची वाङले संयुक्त रूपमा उद्घाटन गरेका हुन् ।
तालिम आगामी चैत २० गतेसम्म चल्नेछ ।
ललितपुरको बडिखेलस्थित पहरी जनजातीले परम्परादेखि नै बाँस, बेत र निगालोका विभिन्न सरसामान बनाउदै आए पनि पछिल्लो पुस्ता आधुनिक भाँडाकुडा प्रयोग गर्न थालेपछि यो पेशा संकटमा परेको छ ।
याँहा पहरी र नगरकोटी समुदायका व्यक्तिहरू बाँसका सामाग्री बनाएर आफ्नो जीविकोपार्जन गर्दै आएका छन् ।

नेपालमा ६३ हजार हेक्टर जमिनमा ५० भन्दा बढी प्रजातिका बाँस पाइन्छन् । बाँसको व्यवसायिकरणका लागि नेपालमा पनि विभिन्न प्रयासहरू शुरु भएका छन् । गत फागुन १५ गतेदेखि १७ गतेसम्म खोटाङको दिक्तेलमा ‘ पहिलो राष्ट्रिय बाँस सम्मेलन ’ समेत सम्पन्न भइसकेको छ ।