पार्टीको जिम्मेवारीमा फर्किए लामिछाने, सरकारको औचित्यता समाप्त भइसकेको दाबी

काठमाडौं । रवि लामिछाने राष्ट्रिय स्वतन्त्र पार्टीको जिम्मेवारीमा फर्किएका छन् । आज (सोमबार) पार्टी केन्द्रीय कार्यालय घण्टीघरमा पत्रकार सम्मेलन गर्दै उनले आफू पार्टीको जिम्मेवारीमा फर्किएको जानकारी गराएका हुन् । पार्टीको जिम्मेवारीमा फर्किएसँगै उनी आज केन्द्रीय समिति बैठकमा सहभागी हुनेछन् । उनी साढे ५ महिनापछि रास्वपाको सभापतिको जिम्मेवारीमा फर्किएका हुन् ।

साथै, उनले सरकार नैतिक रुपमा असफल भइसकेको बताए । उनले सरकारको औचित्यता नै समाप्त भइसकेको दाबी गरे । ‘सरकार कुन नैतिकताको आधारमा बसेको छ ? मलाई थाहा छैन । सरकारको औचित्यता समाप्त भइसकेको छ । संसदबाट बलियो सरकार बन्ने बाटो पनि दुई ठूला दल मिलेर बन्द गरिदिए । लोकतन्त्र बचाउन, संविधान बचाउन होईन, एकअर्काका भ्रष्टाचारी बचाउन सरकार बनाए,’– उनले भने ।