चट्याङ लागेर तीनजनाको निधन 

 पछिल्लो २४ घण्टामा चट्याङ लागेर तीनजनाको निधन भएको छ भने देशभर घटेका विभिन्न घटनामा १६ जना घाइते भएका छन् ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रवक्ता रामबहादुर केसीले चट्याङ लागेर तीनजनाको निधन भएको जनाउँदै १३ जना घाइते भएका बताएका छन् । प्राधिकरणका प्रवक्ता र केसीले हावाहुरीका कारण एकजना र जनावरको आक्रमणबाट दुईजना घाइते भएका बताएका छन् ।

प्राधिकरणका अनुसार शुक्रबारदेखि आजसम्मको २४ घण्टाको अवधिमा ५९ जिल्लामा एक सय नौ वटा विपद्जन्य घटना भएका छन् भने ती घटनामा परेर मावनीयसँगै ठूलो आर्थिक क्षति भएको छ ।

यस्तै २२ वटा पशुचौपाय पनि मरेका छन् । ती घटनाबाट रु दुई करोड ९० लाखको आर्थिक क्षति भएको प्राधिकरणले जानकारी दिएको छ । प्राधिकरणका अनुसार १२ जिल्लामा आगलागी, १३ जिल्लामा चट्याङ, १७ जिल्लामा हावाहुरीका घटना भएका छन् । आगलागीका १४ घटना भएका छन् भने चट्याङका १७ घटना भएका प्राधिकरणका प्रवक्ता केसीले जानकारी दिए ।