तीनकुने घटनाको क्रममा आगजनी र तोडफोडमा संलग्न रहेको अभियोगमा एक जना पक्राउ

काठमाडौँ
प्रहरीले गत चैत १५ गते काठमाडौँको तीनकुने क्षेत्रमा आगजनी, तोडफोडमा संलग्न रहेको अभियोगमा थप एक जनालाई पक्राउ गरी आज सार्वजनिक गरेको छ ।

पक्राउ पर्नेमा काभ्रेपलाञ्चोक जिल्ला धुलिखेल–३ का ४० वर्षीय मनोज भन्ने मिनोज थापा रहेका जिल्ला प्रहरी परिसर काठमाडौँका प्रवक्ता एवं प्रहरी उपरीक्षक अपिलराज बोहराले जानकारी दिएका छन् ।
प्रहरी उपरीक्षक बोहराका अनुसार गत चैत १५ गते काठमाडौँ महानगरपालिका–३२ तीनकुने स्थित खुला चौरमा ‘राष्ट्र, राष्ट्रियता, धर्म, संस्कृति र नागरिक बचाउ महाअभियान नेपाल’द्वारा आयोजित प्रदर्शनका क्रममा भएको घटनाको अनुसन्धानको सिलसिलामा निजी तथा सार्वजनिक सम्पत्तिमाथि तोडफोड तथा आगजनीलगायत आपराधिक कार्यमा संलग्न रहेको अभियोगमा पक्राउ गरिएको हो ।

निजलाई काठमाडौँ जिल्ला अदालतबाट तीन दिनको मिलान म्याद गरी आवश्यक थप अनुसन्धान भइरहेको प्रवक्ता बोहराले बताएका छन् ।