ललितपुर महानगरमा आज शोक विदा

ललितपुर
ललितपुर महानगरले आज शोक विदा दिएको छ । आइतबार अबेर सूचना जारी गर्दै महानगरले ललितपुरका नेता तथा महानगरका पुर्वमेयर बुद्धिराज बज्राचार्यको निधन भएपछि नगरपालिकाको कार्यालय वडा कार्यालयलगायत मातहतका कार्यालयमा आज एक दिन शोक विदा दिएको जानकारी दिएको छ ।उनको शनिबार विहान शिक्षण अस्पताल महाराजगञ्जमा उनको ८९ वर्षको उमेरमा निधन भएको थियो ।

उनका कान्छा छोरा विदेशबाट फर्किएपछि आज अन्त्येष्टि गरिदैछ ।
विसं २०६१ मा राजा ज्ञानेन्द्रको प्रत्यक्ष शासनकालमा संस्कृति, पर्यटन तथा नागरिक उड्ययनमन्त्री नियुक्त भएका बज्राचार्य त्यसअघि विसं २०६० मा ललितपुरको मेयर भएका थिए । विसं २०२७ मा तत्कालीन ललितपुर पञ्चायत १७ को वडाध्यक्ष, २०३२ सालमा पहिलो पटक ललितपुरको प्रधानपञ्च भई उनले काम गरेका थिए ।
विसं २०४६ मा प्रजातन्त्र आएपछि उनी एमालेबाट २०५४ मा ललितपुरको मेयर भएका थिए ।

व्यापार क्षेत्रबाट पहिचान बनाउँदै राजनीतिमा होमिएका बज्राचार्यले २०३६ देखि २०३७ सालसम्मको ललितपुर उद्योग वाणिज्य सङ्घको उपाध्यक्ष, २०३८ सालमा सङ्घको कार्यवाहक अध्यक्ष र २०३९ देखि २०४० सालसम्म अध्यक्षको जिम्मेवारीमा रहेका थिए ।