कोटेश्वरस्थित गहना उद्योगमा विभागको छापा, ६२१ ग्राम काँचो सुन बरामद

काठमाडौं । काठमाडौं महानगरपालिका–३२, कोटेश्वरस्थित बज्राचार्य गहना उद्योगमा राजस्व अनुसन्धान विभागले छापा मारी ६२१ ग्राम काँचो सुन बरामद गरेको छ।

राजस्व अनुसन्धान विभागबाट खटिएको टोलीलाई सशस्त्र प्रहरी बलका डीएसपीले नेतृत्व गरेका थिए। सो टोलीले पसल तथा कारखानाबाट बरामद गरिएको काँचो सुन नियन्त्रणमा लिएको विभागले जनाएको छ।

विभागका महानिर्देशक तीर्थराज चिलुवालले गहना उद्योगमा राजस्व छलीसहित अवैध सुन कारोबार भइरहेको विशेष सूचनाका आधारमा छापा मारिएको जानकारी दिए। उनका अनुसार बरामद सुनसँग सम्बन्धित बिल, बिजक तथा लेखापत्रबारे विभागले थप अनुसन्धान गरिरहेको छ।

विभागले बरामद सुन र व्यवसायिक विवरणलाई परीक्षण गरी कानुनी प्रक्रिया अगाडि बढाउने तयारी गरेको छ।