चलचित्र ‘रमिताको पिरती’मार्फत अभिनेत्री आना शर्माको पुनरागमन

अभिनेत्री आना शर्मा चलचित्र ‘रमिताको पिरती’ लिएर दर्शकमाझ आउने भएकी छिन् । उनको मुख्य भूमिका रहेको चलचित्र ‘रमिताको पिरती’को फस्टलुक सार्वजनिक गर्दै प्रदर्शन मिति तय गरिएको छ । सुदिप्ताको निर्देशनमा तयार भएको यो फिल्म माघको २३ गतेबाट प्रर्दशनमा आउने पक्का भएको छ ।
आज ललितपुरमा आयोजना गरिएको पत्रकार सम्मेलनमा चलचित्रको फस्टलुक सार्वजनिक गरिएको हो । यो चलचित्रमा नायिका आना शर्मा मुख्य भूमिकामा छिन् । उनको साथमा चलचित्रमा नायकद्धय धिरज मगर र विनय श्रेष्ठलाई देख्न सकिन्छ । यही चलचित्रबाट गायक समीर श्रेष्ठ चलचित्रको पर्दामा नायकको रुपमा उदाउँदैछन् ।
महिला केन्द्रित यो चलचित्रको फस्टलुकमा नायिका आना शर्माका विभिन्न लुक्स देख्न सकिन्छ । फिल्ममा उनी ‘रमी’ पात्रको भूमिकामा छिन् । उनीसँग जोडिएका पात्र र उनको कथाको वरिपरी यो चलचित्र बनेको छ ।
आना शर्मा र सन्तोष लम्साल कार्यकारी निर्माता रहेको यो चलचित्रमा आर.पी प्रोडक्सन एसोसियट निर्माताको रुपमा छ । चलचित्रका निर्माता सागर लम्साल हुन् ।
चलचित्रमा सुशान्त केसी, समीर श्रेष्ठ, महेश काफ्ले, अस्मिता अधिकारी र कुशल पोखरेलको संगीत छ ।
शिशिर विशांखेको डीओपी रहेको चलचित्रमा सुनिल सिवाकोटीको सम्पादन, कपिल पराजुलीको कलर, कातिक बरालको कोरियोग्राफी छ ।
यो फिल्मलाई काठमाडौंमा रिच इन्टरटेन्मेन्ट र एप्पल इन्टरटेन्मेन्टले वितरण गर्नेछन् भने काठमाडौं बाहिर एफडी कम्पनीले वितरण गर्नेछ ।
कार्यक्रममा प्रमुख अतिथीको रुपमा पुगेका चलचित्र विकास बोर्डका अध्यक्ष दिनेश डीसीले चलचित्रले केही फरक आयाम र कथा बोकेको भन्दै शुभकामना दिएका थिए ।
कार्यक्रममा बोल्दै नव–नायक समीर श्रेष्ठले आफू यो चलचित्रमा संगीतकारको रुपमा जोडिएको र कथावस्तु मन परेपछि काम गरेको सुनाए ।
यस्तै, नायिका आना शर्माले ४ वर्ष अगाडि नै यो कथा आफूले सुनेको र यसको कथावस्तु फरक लागेकाले जोडिएको सुनाइन् । उनले अहिले आफ्नो जीवनमा ‘रमिताको पिरती’ नै घुमिरहेको तर्क गर्दैै दर्शकलाई यो चलचित्रको कथावस्तु मनपर्ने तर्क गरिन् ।