ललितपुर लुभुका दीपेन्द्र केसीको शव उदयपुरको कटारी भीरमा फेला

ललितपुर

तीनदिनदेखि सुमो गाडीसहित वेपत्ता भएका ललितपुर महालक्ष्मी ८ , लुभुका अन्दाजी ३४ वर्षिय दिपेन्द्र केसीको शव उदयपुरको कटारी –१४ पाखेमारा भीरमा भेटिएको छ । ईलाका प्रहरी कार्यालय कटारीका अनुसार सोमबार साँझ सडकबाट अन्दाजी १ किलोमिटर तल सुमो क्षतिग्रस्त रुपमा भेटिएको थियो ।

क्षतिग्रस्त सुमोसँगै केसीको शव भेटिएको हो । प्रहरीले मध्यराति नै भीरबाट शव निकालेर पोष्टमार्टमका लागि आज विहान कटारी अस्पत्ताल ल्याएको छ । ना १ ज ५८१२ नम्बरको सुमो लिएर शनिबार १३ मंसिरमा केसी उदयपुरको ताप्ली गाउँपालिका रुपाटार जान्छु भनेर हिंडेका थिए ।

केसी रुपाटारमा बिवाहका लागि जन्ती जान रिजर्भ भएकाले एक्लै सुमो लिएर निस्किएका थिए । शनिबार राती सिन्धुलीको खुर्कोट प्रहरी बिटमा ईन्ट्री गरेर गएका केसी रातिदेखि सम्पर्क विहिन भएका थिए । उनी कटारी १४ घुर्मी नजिकसम्म आईपुगेको जानकारी गराएपछि वेपत्ता भएका थिए ।

फोन लाग्ने तर नउठ्ने भएपछि स्थानीय र प्रहरीलगायतले कटारी. १४ आसपासमा खोजी तिव्र बनाएका थिए । खोजीका क्रममा सिद्धिचरण राजमार्गको कटारी–घुर्मी सडकखण्डको पाखेभीरमा उनको शव फेला पारेको हो । केसी रातीको १२ बजेतिर दुर्घटनामा परेको हुन सक्ने अनुमान प्रहरीको छ । पाखेभीर आसपास गाउँ नभएको र अनकण्टार भीर भएकाले घटनाबारे कसैले पनि थाहा पाउन सकेका थिएनन् । खोजीको क्रममा सडकमा टायर धसिएको पाईएपछि स्थानीय र प्रहरीले भीरमा खोजी केन्द्रित गर्दा सुमोको पाटपुर्जा र जुत्ता भेटिएपछी शव र सुमो क्षत विक्षत रुपमा फेला परेको हो ।