ठमेलमा पर्यटक प्रहरीको ‘रात्रिसेवा’

१२ फागुन, काठमाडौं । राजधानीको प्रमुख पर्यटकीयस्थलका रुपमा रहेको ठमेल क्षेत्रमा पर्यटक प्रहरीले रात्रि सेवा शुरु गरेको छ । काठमाडौँ महानगरपालिका–१६, १७ र २६ मा रहेको ठमेल क्षेत्रमा आउने पर्यटकको सुरक्षाका लागि पर्यटक प्रहरीले शिवरात्रिदेखि रात्रि सेवा शुरु गरेको छ । अहिलेसम्म पर्यटक प्रहरीले उक्त क्षेत्रमा दिउँसोमात्र सेवा प्रदान गर्दै आएको थियो ।

त्यस्तैगरी पर्यटक प्रहरी एकाइ भृकुटीमण्डपका प्रमुख, प्रहरी निरीक्षक अस्मिता कपाली ठमेल क्षेत्रमा आउने पर्यटक रातिको समयमा ठगिने तथा लुटपाट हुने क्रम बढेपछि पर्यटक प्रहरीले रात्रिकालीन सेवा प्रदान शुरु गरेको बताए। “ठमेल क्षेत्रमा रात्रिकालीन सेवा प्रदान गरेसँगै सो क्षेत्रमा पर्यटक प्रहरी जनशक्तिसमेत थप गरिएको छ।

ठमेल क्षेत्रमा रातिको समयमा भारतीय पर्यटक बढी ठगिन थालेको उजुरी पर्यटक प्रहरीमा आएको थियो । सरकारले घोषणा गरेको नेपाल भ्रमण वर्ष २०२० लाई सुरक्षाको हिसाबले समेत सफल बनाउन रातिको समयमा सेवा प्रदान गरिएको पर्यटक प्रहरी प्रमुख कपालीले जानकारी दिए ।

त्यस्तै विसं २०३५ माघ १२ मा स्थापना भएको भएको पर्यटक प्रहरीमा हाल २२७ जनाको दरबन्दी रहेको छ । हाल उपत्यकाको १० र उपत्यकाबाहिर १७ स्थान गरी २७ स्थानबाट पर्यटक प्रहरीले पर्यटकलाई सेवा दिइरहेको छ । पर्यटक प्रहरी नेपाल प्रहरीको भए पनि उनीहरुको सेवा सुविधा भने पर्यटन विभागमार्फत हुँदै आएको छ ।

पर्यटक प्रहरीले पर्यटकका लागि आवश्यक सूचना प्रवाह गर्ने, पर्यटकबाट आएका उजुरी निवेदन छानबिन र कारवाही गर्ने, इजाजत नभई पथप्रदर्शक कार्य गर्नेमाथि नियन्त्रण तथा कारवाही गर्ने, फौजदारी अपराध सम्बन्धमा सम्बन्धित दूतावासमा सम्पर्क राखी स्थानीय प्रहरीमार्फत कारवाही अगाडि बढाउने, होटल, ट्राभल, ट्रेकिङ, ¥याफ्टिङ एजेन्सीमा निरीक्षण गर्नेलगायत काम गर्दै आएको छ ।

ठमेल पर्यटन विकास परिषद्का अध्यक्ष प्रकाशनरसिंह राणा पर्यटक प्रहरीको रात्रिकालीन सेवासँगै ठमेल क्षेत्रको सुरक्षामा थप सहयोग पुगेको बताउनुहुन्छ । “ठमेल क्षेत्रमा हुने आपराधिक क्रियाकलापलाई रोक्न परिषद्ले प्रहरीसँग सहकार्य गरेर काम गरिरहेको छ”, उहाँ भन्नुहुन्छ । पर्यटक प्रहरीका अतिरिक्त ठमेल क्षेत्रको सुरक्षा महानगरीय प्रहरी वृत्त सोह्रखुट्टे र महानगरीय प्रहरी वृत्त दरबारमार्गले गरिरहेको छ ।

पर्यटन विभागका महानिर्देशक डण्डुराज घिमिरे पर्यटक प्रहरीको आवश्यकतालाई हेरेर अन्य ठाउँमा पनि विस्तार गर्दै लैजाने बताउनुहुन्छ । “नयाँ स्थानमा पर्यटक प्रहरी राख्नका लागि आएका मागलाई अध्ययन गरी नेपाल प्रहरीमा पठाउने र प्रहरीले सदर गरेपछि उक्त ठाउँमा पर्यटक प्रहरी खटाउने गरेका छौँ”, उहाँ भन्नुहुन्छ ।

नेपालको पर्यटन विकासमा पर्यटक प्रहरीले महत्वपूर्ण भूमिका खेलेको उहाँको भनाइ छ । महानिर्देशक घिमिरे मुलुकको आर्थिक मेरुदण्डका रुपमा रहेको पर्यटन क्षेत्रलाई व्यवस्थित गर्ने कुरामा विभाग गम्भीर भएर लागेको बताउनुहुन्छ ।

नेपाल प्रहरीका केन्द्रीय प्रवक्ता, प्रहरी नायब महानिरीक्षक शैलेश थापा क्षेत्री पर्यटक प्रहरीलाई समयानुसार सातै प्रदेशमा लैजाने बताउनुहुन्छ । “पर्यटन विभागले आवश्यकता महसुस गरेर पर्यटक प्रहरी खटाउन आवश्यक ठाने हामी प्रहरी पठाउँछौँ”, उहाँ भन्नुहुन्छ । ह्हाल नेपाल प्रहरीमा ७२ हजारभन्दा बढी जनशक्ति रहे पनि पर्यटक प्रहरीका रुपमा २२७ जनालाई खटाउँदै आएको छ । रासस