‘कोरोनाको चुनौती सामना गर्न प्रभावकारी व्यवस्थापन आवश्यक’

१३ वैशाख ०७८, काठमाडौं । प्रहरी महानिरीक्षक शैलेश थापा क्षेत्रीले कोरोनाको चुनौती सामना गर्न नेपाल प्रहरीले प्रभावकारी भूमिका खेल्नुपर्ने बताएका छन् । काठमाडौँ उपत्यकाका प्रहरी कार्यालयका प्रमुखलाई आइतबार प्रहरी प्रधान कार्यालयमा निर्देशन दिँदै उनले कोरोनाको दोस्रो लहरबाट सिर्जित समस्या तथा चुनौतीलाई दृष्टिगत गरी यसको नियन्त्रणका लागि चाल्नुपर्ने कदम तथा प्रभावकारी व्यवस्थापनमा प्रहरी सक्रिय रुपमा लाग्नुपर्ने बताएका छन् ।
उनले कोरोनाको सङ्क्रमण रोक्न नेपाल सरकार स्वास्थ्य मन्त्रालयद्वारा तोकिएको सुरक्षा मापदण्डलाई दुरुस्त रुपमा कार्यान्वयन गराउनु प्रहरीको प्रमुख दायित्व रहेको बताएका थिए । महानिरिक्षक थापाले कोरोनासँग लड्न अन्य सुरक्षा निकायलगायत सरोकारवालासँग आवश्यक समन्वय, सहकार्य र अनुगमनमा तीव्रता दिनुपर्ने बताएका थिए । सङ्गठनले तय गरेका नीति तथा योजना व्यवहारमा लागू गर्दै परिणाम देखिने गरी कार्यान्वयन गर्नुपर्ने उनको भनाइ थियो ।

प्रहरी महानिरीक्षक थापा क्षेत्रीले सम्भाव्य चुनौती सामना गर्न वैकल्पिक व्यवस्थालाई थप प्रभावकारी बनाउनेतर्फ सबै प्रहरी कर्मचारी अग्रसर हुनुपर्ने उल्लेख गरे । उनले कोरोना नियन्त्रणमा अपनाइने मास्क, स्यानिटाइजरको प्रयोगलगायत सम्पूर्ण सुरक्षा विधिको पूर्ण पालना गर्ने तथा उपचार व्यवस्थापन चुस्त राख्नसमेत निर्देशन दिए ।