काठमाडौं उपत्यकामा खोप लगाउनेको भीड, थपिए खोप केन्द्र

२३ साउन ०७८, काठमाडौं । कोरोना खोप लगाउनेहरुको भीड बढ्न थालेपछि काठमाडौँ उपत्यकामा ८३ खोप केन्द्र थप गरिएको छ ।यस अघि ६६ खोप केन्द्र थिए । थपिएपछि अहिले खोपकेन्द्र १४९ पु¥याइएको छ ।
स्वास्थ्य तथा जनसङ्ख्या मन्त्रालयले कोरोना भाइरसविरुद्धको खोप लगाउन खोप केन्द्र थप गरेको हो । मन्त्रालयका सहप्रवक्ता डा समिरकुमार अधिकारीले खोप लगाउनेको भीड हुन थालेपछि खोप केन्द्र थप गरिएको बताएका छन् ।
उनका अनुसार देशभरि नै पहिलेको भन्दा एक हजार ४३३ खोप केन्द्र थप गरिएको हो । पहिले दुई हजार ९८९ खोप केन्द्र भएकोमा अहिले त्यो सङ्ख्या चार हजार ४२२ पु¥याइएको छ । सरकारले २०७७ माघ १४ गतेदेखि नेपालमा कोरोना भाइरसविरुद्धको खोप लगाउन शुरु गरेको हो । अहिलेसम्म नेपालमा ४४ लाख तीन हजार २१ जनाले पहिलो मात्रा र २२ लाख आठ हजार ५५ जनाले पूर्ण मात्रामा खोप लगाइसकेका छन् ।