श्री लालीगुराँस सहकारीको उठेन ऋण, १४ महिनापछि ८० लाख मात्रै फिर्ता गर्ने तयारी

ललितखबर
ललितपुर पुल्चोकस्थित श्रीलालीगुराँस बहुउद्देश्यीय सहकारी २०८० फागुनमा समस्याग्रस्त घोषणापछि बन्द भयो ।
सहकारीको सबै कागजात समस्याग्रस्त सहकारी व्यवस्थापन समितीले कव्जामा लिएर अनुसन्धान सुरु गर्‍यो ।
सहकारीको सम्पती खोजतलास र ऋण उठाउने क्रममा समिती असफल देखिएको छ ।
समितीका सदस्य ध्रुव आचार्य सहकारीको ७ अर्व १७ करोड रुपैयाँ सम्पती देखिएको भए पनि अहिलेसम्म ८० लाख मात्रै ऋण असुली भएको ललितखबरलाई जानकारी दिएका छन् ।

समिती सदस्य आचार्य असारभित्रै बचतकर्ताको रकम फिर्ता गर्ने तयारी भइरहेको बताउछन् । भन्छन्, ‘हामीले थोरै रकम भएका बचतकर्ताको पैसा फिर्ता गर्ने गरेका थियौं । अब सबै बचतकर्तालाई दामासाहीले बराबर पैसा दिन्छौं ।’ समितीले निरन्तर ताकेता गरेपनि ऋणीले पैसा फिर्ता गर्न मानेका छैनन् ।

समितीले आफूले जम्मा गरेको रकमको मागदाबी गर्दै निवेदन दिन सूचना जारी गरेकोमा हालसम्म ४ हजार ५ सय २८ जनाले मात्रै बचत फिर्ताको माग गरेका छन् । सहकारीमा करिव २२ हजारभन्दा धेरै बचतकर्ता रहेकोमा थोरैले मात्रै फारम भरेका छन् ।

जग्गा लिलामीको तयारी
सहकारीको नाममा ४२ वटा जग्गा फेला परेको छ । ती सबै जग्गाको मुल्याङ्कनको काम भइरहेको छ । यही साउन महिनाभित्र जग्गाको लिलामी प्रकाशित गरेर समितीले हिसाव फरफार गर्ने समितीले योजना बनाइरहेको छ । जग्गा, डेरी विद्यालयलगायत सम्पती लिलामीपछि केही रकम जम्मा हुने र सो रमक समेत दोश्रो चरणमा वितरण गर्ने समितीको तयारी छ ।
ऋण उठाउन किन भइरहेको छ समस्या ?
सहस्याग्रस्त सहकारीको ऋण उठाउन ठूलो समस्या देखिएको छ ।
समितीको अधिनमा रहेको सहकारीका ऋणीले व्याज र हर्जना तिर्न नपर्ने हुँदा पछिल्लो समय उनीहरु पैसा तिर्न अटेर गरिरहेका छन् । सोही पैसा बैकमा राखे व्याज खान पाउने तर ऋण नतिरे कुनै कारवाही नपर्ने हुँदा ऋणीलाई हाइसन्चो छ । धेरै ऋणीहरु समितीमा आउने हिसाव गर्ने र फर्केपछि लामो समय सम्पर्कविहीन हुने गरेका छन् ।
ऋण उठाउन ज्यादै कठीन भएपछि अब ती ऋणीलाई व्याज र हर्जना लगाउने समितीले योजना बनाइरहेको बुझिएको छ । ऋणीसँग लिएको व्याज बचतकर्तालाई समेत दिने विषयमा समितीमा छलफल भइरहेको छ ।
अर्वौ रकम हिनामिना
सहकारीको अर्वौ रकम हिनामिना भएको पाइएको छ । समितीका सदस्य आचार्यका अनुसार १ अर्ब ७८ करोड ऋण लगानी कहाँ छ भन्ने समितीले पत्ता लगाउन सकेको छैन । चितवनमा २० विघा जमिन रहेको भनेर प्रचार गरिएको भए पनि ७ विघा मात्रै फेला परेको उनले बताएका छन् ।

समिती असारभित्रै १९ वटा सहकारीको २२ करोड रुपैयाँ असारभित्रै फिर्ता गर्ने योजनामा छ । पछिल्लो समय समितीले कुबेर बचत तया ऋण सहकारी, स्ट्याण्डर्ट मल्टिप्रर्पोज सहकारी र चार्टड बचत तथा सहकारी संस्थाको सबै ऋण असुल गरेर बचत फिर्ता सम्पन्न गरेर समितीले हिसाव साफसाफ गरेको छ । अन्य दुई सहकारीको सबै हिसाव फरफार गर्ने क्रममा रहेको छ ।