चिनियाँ नागरिकले एटिएम ह्याक गरी निकाले लाखौं रुपैयाँ

१५ भदौ ०६६, काठमाडौं । नेपाली एटिएमबाट करोडभन्दा धेरै पैसा झिक्ने ५ जना चिनियाँ नागरिकलाई प्रहरीले आइतबार महानगरिय प्रहरी परिसर काठमाडौं सार्वजनिक गरेको छ ।

उनीहरु पाँचै जनासँगै महानगरीय प्रहरी परिसर काठमाडौंले आइतबार पाँचै जना चिनियाँ नागरिकसँगै १ करोड २६ लाख ४५ हजार नेपाली रुपैयाँ सार्वजनिक गरेको छ । पक्राउ पर्ने चीनिया नागरिकहरुमा ३२ वर्षका झु लियाङ आङ, ४० वर्षका लु जियालिङ, ३५ वर्षका चेन विन विन, ३० वर्षका क्यु याङयिङ, २९ वर्षका लिन जिनमिङ रहेका छन् ।

शनिबार दरबारमार्गको नबिल बैंकको एटीएम मेसिनबाट पैसा झिक्दै गर्दा एक जना चिनियाँ नागरिक पक्राउ परेका थिए । त्यसपछि प्रहरीले उनीहरु बसेको होटलबाट अन्य ४ जनालाई पक्राउ गरेको थियो ।

नेपाल राष्ट्र बैंक र नेपाल बैंकर्स संघले सर्वसाधारणको निक्षेप सुरक्षित रहेको बताएका छन् ।