काठमाडाैं । सोमबार साँझ करिब ५ः३० बजेतिर महानगरीय प्रहरी परिसर भक्तपुरमा एउटा सूचना आयो, एउटा व्यक्ति कम्मरमा पेस्तोल भिरेर सडकमा हिँडिरहेका छन् ।
सूचना पाएलगत्तै महानगरीय प्रहरी परिसर भक्तपुरबाट विशेष टोली परिचालन भयो । टोली परिचालन भएको करिब डेढ घण्टा पछि, ७ बजे आसपास एकजना व्यक्ति पेस्तोलसहित पक्राउ परे ।
पक्राउ पर्नेमा बाराको फेटा गाउँपालिका घर भएका ३८ वर्षीय शम्भुप्रसाद साह छन् ।
प्रहरीका अनुसार साह एकजना व्यक्तिको ‘हत्या गर्न’ राजधानी काठमाडौं आएको खुलेको छ ।
महानगरीय प्रहरी परिसर भक्तपुरका प्रमुख एसपी सविन प्रधानले साह सोमबार नै भक्तपुर पुगेको बताए । एसपी प्रधानका अनुसार साह बीपी राजमार्गको बाटो भएर सार्वजनिक यातायात चढेर काठमाडौं आएका थिए ।
भक्तपुर ओर्लिएको करिब ३ घण्टापछि साह पक्राउ परेका एसपी प्रधानले बताए ।
‘उनले कसैको हत्या गर्ने योजना बनाएको कुरा प्रारम्भिक अनुसन्धानबाट खुल्न आएको छ,’ एसपी प्रधानले भने, ‘यस विषयमा थप अनुसन्धान भइरहेको छ ।’
प्रहरीले साहको साथबाट १ थान कटुवा पेस्तोल र त्यसमा लाग्ने ५ राउण्ड गोली बरामद गरेको छ । प्रहरीका अनुसार साहले १ राउण्ड गोली पेस्तोलमा लोड गरिसकेका थिए भने ४ राउण्ड गोली खल्तीमा राखेका थिए ।
प्रहरीले उनी ‘सार्पसूटर’ भएको आशंकामा उनको ‘क्रिमिनल ब्याकग्राउण्ड’ (अपराधिक पृष्ठभूमि)को अध्ययन पनि थालेको छ ।
‘उनी यसअघि पनि कुनै घटनामा संलग्न थिए कि भन्ने आशंकामा उनको क्रिमिनल ब्याकग्राउण्ड पनि अध्ययन गरिरहेका छौं,’ एसपी प्रधानले भने, ‘अहिले सबै विषय अनुसन्धानकै क्रममा छ ।’
प्रतिक्रिया