सागमा स्वर्ण जित्ने सुवासलाई कोञ्ज्योसोमको एक लाख

१ पुस ०७६, कोञ्ज्योसोम । १३ औं दक्षिण एसियाली खेलकुद (साग) मा स्वर्ण पदक विजेता सुवास तामाङ र कास्य पदक रविना श्रेष्ठलाई कोञ्ज्योसोम गाँउपालिकाले सम्मान गरेको छ । मंगलबार गाँउपालिकाले सुवास तामाङ्गलाई नगद १ लाख र कास्य पदक विजेता रविना श्रेष्ठलाई २५ हजार सहित सम्मानित गरेको हो ।
सम्मान तथा पुरस्कार हस्तान्तरणपछि कार्यक्रममा बोल्दै गाँउमा हुर्के बढेका युवाहरुले देशको इज्जत बढाउन पदक जित्नु खुशीको कुरा भएको बताउनु भयो ।
गाँउपालिकाका अध्यक्ष गोपिलाल सिङ्गतानले स्वर्ण पदक कोञ्ज्योसोम गाँउपालिकाका बासिन्दाले देशको लागि पदक जितेपछि गाँउपालिकाको इज्जत बढेको बताउनु भयो । उहाँले भन्नुभयो,‘हाम्रो गाँउपालिका खेल क्षेत्रमा अघि बढिरहेको छ । आगामी दिनमा अन्य विद्यामा पदक जित्ने आशा छ ।’
प्रदेश सासंद लालकुमारी पुनले पहाडको अभाव र कष्ठकर जीवन बाँचेका आदिवासी समुदायले देशको इज्जत बढाउनु गर्वको कुरा भएको बताउनु भयो ।
कार्यक्रममा गाँउपालिकाकी उपाध्यक्ष मिङ्मा लामा र प्रशिक्षक दिपक थापामगरलगायतको सहभागिता थियो ।