कुमारीपाटी महालक्ष्मी विकास बैंकमा धितोमा राखेको २५ तोला सुन पाँच वर्षपछि नक्कली भएपछि …!

-ललितपुर खबर-
१४ भदौं ०७८, ललितपुर । मान्छेले आफुले दुःख गरेर कमाएको रकमबाट सुनचाँदी खरिद गर्दछन् । त्यो आफुलाई नगद आवश्यक गर्दा कसैले बेचविखन त कहिले बैंकमा धितोमा राखेर रकम निकाल्ने गर्दछन् । धितोमा बैंकमा राखेको सुन पाँच वर्षपछि नक्कली हुँदा कसलाई दुःख लाग्दैन र ?
ललितपुरको कुमारीपाटीमा त्यस्तै एउटा घटना घटेको छ । ललितपुर कुमारीपाटीमा शाखा कार्यालय रहेको महालक्ष्मी विकास बैंकमा एक ऋणीले ऋण चुक्ता गरेर धितो राखेको सुन फिर्ता माग्दा नक्कली भन्दै बैंकले फिर्ता पठाएको छ ।
ललितपुर महानगरपालिका वडा नम्बर ११ चाकुपाटकी विष्णु महर्जनले ६ वर्षअघि २०७२ फागुनमा कुमारीपाटीको महालक्ष्मी विकास बैंकबाट ऋण लिएकी थिइन् ।
सुन राखेर उनले १४ लाख बढी रुपैयाँ ऋण लिएकी थिइन् । उनले बैंकलाई २५ तोला सुन धितो बुझाएकी थिइन् ।
सुन धितो लिँदा बैंकले जाँचेरै लिएको थियो । तर लिने बेलामा भने बैंकले सुन नक्कली रहेको बताएको छ ।
बैंकले महर्जनलाई गत असार ३ गते बोलाएको थियो ।
उनले ऋण चुक्ता गर्न बैंकसँग केही समय मागिन् । तर मौखिक निवेदन नहुने भन्दै बैंकले लिखित निवेदन मागेको थियो ।
बैंकले लिखित कागजी रूपमा १५ दिनभन्दा बढी समय दिन नमिल्ने बताए पनि महर्जनलाई भदौ १० गते सम्मको समय दिएको थियो । भदौ १० गतेभित्र जसरी पनि तिर्नु पर्ने हुँदा उनले आफन्त तथा साथीहरूसँग सहयोग मागिन् ।
उनी बैंकमा पुगिन् । त्यसदिन उनले बैंकका म्यानेजर सुनिलकुमार नेपाललाई भेटेकी थिइन् ।
ऋण विभागको प्रमुख पनि त्यहाँ आइपुगे । उनले बैंकमा आठ लाख ३९ हजार रुपैयाँ चुक्ता गरिन् । १५ हजार नगद केही समय अघि नै तिरिसकेकी थिइन् । सुरूमा सामान जाँचेर लिएको बैंकले पछि फिर्ता लिन जाँदा भने नहेर्न भनेको उनको भनाइ छ ।
त्यसो भनेपछि विष्णु र उनका दाइले सुन देखाउन जिद्दी गरेका थिए । म्यानेजरले आनाकानी गरेका थिए ।
केही नलागेपछि विष्णुका दाइले चिनजानको संगठनका केही मानिसहरूलाई बोलाए ।
सुन नक्कली भएको कुरा बाहिरिएपछि उनीहरूले प्रहरीलाई खबर गरेका थिए । सोही रात नै जना महानगरीय प्रहरी परिसर जावलाखेल पुगे । बैंकका सिइओ बोधराज देवकोटासहित सबैजना राति साढे ११ बजेसम्म छलफलमा बसेका थिए ।
सिइओ देवकोटाले भने शाखामा के भएको हो भन्नेबारे बुझ्न दुई दिनको समय मागेका थिए ।
सुन दिन नसकेमा त्यस बराबरको पैसा दिने भन्दै कागजसमेत गरिएको छ ।
बैंकका प्रमुख कार्यकारी अधिकृत बोधराज देवकोटाले ‘सुन फिर्ता गर्छौँ’ भनेर हस्ताक्षर गरेका छन् । ‘सुन फिर्ता गर्छौँ’ भनेर प्रहरीकहाँ भनेपनि आफूलाई बैंकले अझै सुन नदिएको महर्जनले बताएकी छिन् । परिसरका प्रहरी नायब उपरीक्षक दीपक भारतीले पनि यसमा अनुसन्धान भइरहेको बताएका छन् ।