९ जेठ ०७९, काठमाडौँ । काठमाडौंको राज ट्रेडर्सका राजकिशोर शाह, पुष्करकुमार सिंह र भविचन महतो कोइरीविरुद्ध तीन अर्ब ७२ करोड ५८ लाख रुपैयाँ बिगो माग गरेर मुद्दा दायर भएको छ ।
उनीहरूले भारतीय चिनी अवैध रूपमा चोरी पैठारी गरेर मालवस्तु तथा ढुवानीका साधन अनुगमन प्रणाली भीसीटीएसमा प्रविष्ट भएको कागजात २८ पटकसम्म सच्याएर काठमाण्डौ ल्याएर बिक्री गरेको विभागले जनाएको छ ।
यस्तै चितवनको भरतपुरमा रहेको निरज ट्रेड एन्ड सप्लायर्सका प्रोपराइटर श्रीराम ठाकुर र खाता सञ्चालक जटाशंकर जैसवालविरुद्ध १५ करोड ९७ लाख पाँच हजार रुपैयाँ जरिबानाको माग राखेर उच्च अदालत पाटनमा मुद्दा दर्ता गरिएको राजस्व अनुसन्धान विभागले जनाएको छ ।
उनीहरूले मूल्य अभिवृद्धि कर भ्याटतर्फ दुई करोड ४१ लाख ३५ हजार र आयकरतर्फ पाँच करोड ९७ लाख रुपैयाँ कर छलेको विभागले जनाएको छ । कर छलीको कुल रकम सात करोड ९८ लाख रुपैयाँको दोब्बर रकम माग गरेर विभागले मुद्दा दायर गरेको हो ।
प्रतिक्रिया