चलचित्र ‘म’ को दुई पोस्टर सार्वजनिक

३१ असार ०७९, काठमाडौं । चलचित्र ‘म’ को दुई पोस्टर सार्वजनिक भएको छ । पोस्टर कान्तिपुर िचलचित्र एकेडेमीको फेसबुक पेजमार्फत सार्वजनिक गरिएको हो ।
सार्वजनिक पोस्टरमा अनुसार नयाँ अनुहार संजोग रसाइलीको वरिपरि कथा र अन्य पात्रहरू घुमेको अनुमान लगाउन सकिन्छ । संजोग चलचित्र एकेडेमीका अभिनयका विद्यार्थी हुन् । उनले यसै चलचित्र मार्फत अभिनयमा डेब्यू गरेका हुन् ।
निर्माण टिमले केही दिनअघि एक मिनेटको टिजर सार्वजनिक गरेको थियो । टिजर र पोस्टर अनुसार निशा अधिकारी डाक्टर, रुविना थापा नर्स, निराजन प्रधान पुलिस अफिसर, नरेन खड्का ग्याङ्स्टार लुक्समा देखाइएको छ । टिजरमा सरोज खनाल, सविन श्रेष्ठ, सरिता लामिछाने र पुनम श्रेष्ठलाई देखाइए पनि उनीहरूको चरित्र खुलाइएको छैन ।
चलचित्रको निर्देशक सुवर्ण थापा हुन् । उनले बनाएको चलचित्र ‘सुनगाभा’ले समीक्षात्मक रूपमा राम्रो प्रतिक्रिया पाएको थियो । उनको नयाँ चलचित्र ‘राधा’ आगामी १० भदौमा रिलिज हुँदैछ ।
फिल्ममा तेन्जिङ पाल्देनको छायांकन, बनिष शाहको सम्पादन, विमला हुमागाई र पदम पुरीको निर्माण तथा कान्तिपुर चलचित्र एकेडेमीका सिइओ प्रकाश पुरीका लेखन तथा क्रिएटिभ प्रोड्युसर छन् ।

कान्तिपुर सिनेमाजको प्रोडक्सन र कान्तिपुर चलचित्र एकेडेमीको प्रस्तुतीमा निर्माण भएको यो फिल्म २० साउनबाट रिलिज हुँदैछ ।