सरकारले जग्गा दिए क्रिकेट रंगशाला बनाउन पहल गर्ने काठमाडौं महानगरका मेयर बालेनको भनाई

नेपाल सरकारले काठमाण्डौ महानगर वा आसपासमा आवश्यक १ सय रोपनी जग्गा उपलब्ध गराउँछ भने काठमाण्डौ महानगरबाट रंगशाला बनाउन हामी पहल गर्नेछौँ

१९ भदौं । काठमाडौं महानगरका मेयर बालेन शाहले सरकारले जग्गा उपलव्ध गराए काठमाडौं महानगरले क्रिकेट रंगशाला निर्माणको पहल गर्ने मेयर बालेन शाहले घोषणा गरेका छन् । यति धेरै नेपालीहरु एक्कासी श्रीलंका किन आइरहेका छन् भन्दै प्रश्न गरेको र स्टेडियममा ४० देखि ५० जना जति भारतीय क्रिकेट समर्थक भेटिएको तर नेपालीहरुको संख्या १ हजार ५०० देखि दुई हजाररहेको उल्येख गर्दै नेपालमा क्रिकेटको क्रेज बढेको उनको भनाई छ ।
त्यहाँ पुगेका सबै नेपालीहरुको मात्रै खर्च ३० करोड पुगेको अनुमान गर्दै उनले त्यहि स्तरको रंगशाला जग्गा बाहेक ८० देखि ९० करोडम बन्ने उल्येख गरेका छन् ।
मेयर बालेनले यस्तो मात्रै रंगशाला र केहि ठुला खेलहरु हुने हो भने खेल विकास हुन सक्ने र एकै खेलबाटै करोडौँ रकम आर्जन हुने बताएका छन् ।

यस्तो छ महानगरका मेयर बालेनले लेखेको स्टाटस ः

फ्यानको रुपमा क्रिकेट हेर्न श्रीलंका पुग्दा श्रीलंकाको अध्यागमन कर्मचारीको प्रश्न थियो, “यति धेरै नेपालीहरु एक्कासी श्रीलंका किन आइरहेका छन् ?“ श्रींलंकाको अध्यागमन चकित पर्ने गरिको संख्यामा नेपालीहरु त्यहाँ पुग्दै थिए ।
त्यसपछि स्टेडियम पुग्दा देखियो, त्यहाँ ४०देखि ५० जना जति भारतीय क्रिकेट समर्थक थिए भने नेपालीहरुको संख्या १हजार ५०० देखि दुई हजारको बिचमा थियो । नेपाली क्रिकेट फ्यानहरु विभिन्न देशबाट श्रीलंका पुगेका थिए । अनुमानित हिसाब गर्ने हो भने त्यहाँ पुगेका सबै नेपालीहरुको मात्रै खर्च ३० करोड पुग्यो होला ।
टिभीमा देखिने बिराट, रोहीतहरुलाई आँखा अगाडि मैदानमा देख्न पाएका थियौँ । उनीहरुको हाउभाउलाई प्रत्यक्ष अनुभव गर्न पाइन्थ्यो । खेलको सुरुमा उनीहरुको हाउभाउ नेपालीलाई सजिलै जितिनेमा ढुक्क भए जस्तो देखिन्थ्यो । विश्वकै उत्कृष्ट खेलाडिहरुमा नेपालसँग खेल्दा त्यस्तो हाउभाउ देखिनु अस्वभाविक पनि थिएन । तर जसै खेल बढ्यो, जसै नेपालको ब्याटिङ अगाडि बढ्दै गयो, तब त भारतीय खेलाडिहरुको हाउभाउ पुरै रक्षात्मक बनिसकेको थियो । ठीक त्यहि बेला हामीले क्रिकेट जित्यौँ । अन्तिम नतिजा जे आए पनि हामीले यसपटकको एसिया कपमा पाउने जति पाइसकेका थियौँ ।
गजबको कुरा के थियो भने त्यहाँ खेल भइरहेको रंगशाला पनि हाम्रो त्रिविको क्रिकेट स्टेडियम जस्तै थियो, केहि प्याराफिट र अलि बढि सुविधा । नेपालमा त्यहि स्तरको रंगशाला जग्गा बाहेक ८० देखि ९० करोडमा नै बन्छ सायद ।
यसैले नेपाल सरकारले काठमाण्डौ महानगर वा आसपासमा आवश्यक १ सय रोपनी जग्गा उपलब्ध गराउँछ भने काठमाण्डौ महानगरबाट रंगशाला बनाउन हामी पहल गर्नेछौँ । यस्तो मात्रै रंगशाला र केहि ठुला खेलहरु हुने हो भने खेल विकास हुन सक्छ । र, एकै खेलबाटै करोडौँ रकम आर्जन हुन सक्छ । त्यो बाहेक खेलाडि र तल्लो तहमा सिकाइ सुविधाका लागि अबको ३ बर्षमा सकेसम्म हरेक वडामा एक हुने गरि बलिङ नेट राख्ने प्रबन्ध पहिले नै गरि सकेको छौ ।