वालकुमारी घटनाको छानविन गर्न भन्दै जाँचबुझ आयोग गठन

१६ पुस । गतविहीबार ललितपुरको वालकुमारीमा कोरिया जान भाषा परिक्षामा सहभागी गराउन माग गर्दै विरोधमा उत्रेका युवामाथि प्रहरीले गोलि प्रहार गरेर दुई युवाको हत्या गरेको घटनामा सरकारले जाँचबुझ आयोग गठन गरेको छ ।
आज आइतबार बसेको मन्त्रिपरिषद् बैठकले उच्च अदालतका पूर्वन्यायाधीश शेखर पौडेलको अध्यक्षतामा घटनाका बारेमा निष्पक्ष र वस्तुगत छानविन गर्ने तथा छानविन गर्न देहायबमोजिमको जाँचबुझ आयोग गठन गरेको हो ।
आयोगका अन्य सदस्यहरुमा पूर्व एआइजी अरुण बिसी र गृहमन्त्रालयका सहसचिव नारायणप्रसाद भट्टराई सदस्य रहेका छन् ।
बैठकले आयोगलाई उक्त घटनामा भएको मानवीय, भौतिकलगायत क्षतिको विवरण अध्ययन÷विश्लेषण गर्ने, सुरक्षा प्रबन्ध तथा सुरक्षा योजनाको अध्ययन गरी त्यसमा भएका कमीकमजोरी पत्ता लगाउने,घटनासँग सम्बन्धित व्यक्ति, पदाधिकारी एवं निकायको भूमिकाका बारेमा अध्ययन गरी दोषी देखिएका जोकोहीलाई कारबाहीको सिफारिस गर्ने र आगामी दिनमा यस प्रकारका घटना हुन नदिन अपनाउनुपर्ने उपाय समेटी सुझावसहितको प्रतिवेदन कार्य प्रारम्भ गरेको १(एक) महिनाभित्र पेश गर्ने कार्यादेश तोकेको छ ।